Kosova ka regjistruar deficit tregtar prej 568 milionë eurosh në gusht të këtij viti, sipas të dhënave për tregtinë e jashtme të mallrave. Eksporti gjatë kësaj periudhe ka mbuluar vetëm 15 për qind të importit.
Sipas të dhënave të Agjencisë së Statistikave, në gusht 2026 Kosova eksportoi mallra në vlerë prej 100.5 milionë eurosh, që paraqet rritje prej 31.9 për qind krahasuar me të njëjtën periudhë të vitit të kaluar.
Ndërkohë, importi arriti në 668.5 milionë euro, duke shënuar rritje prej 9 për qind krahasuar me gushtin e vitit 2025.
Deficiti tregtar në gusht ishte 568 milionë euro, ndërsa në të njëjtën periudhë të vitit 2025 kishte qenë 536.8 milionë euro, që paraqet një rritje prej 5.8 për qind.
Në strukturën e eksporteve, pjesën më të madhe e përbëjnë metalet bazë dhe artikujt prej tyre me 21.8 për qind. Pas tyre renditen produktet minerale me 15.5 për qind, ushqimet e përgatitura, pijet dhe duhani me 13.3 për qind, plastika, goma dhe artikujt prej tyre me 8.8 për qind, si dhe artikujt e ndryshëm të prodhuar me 6.5 për qind.
Sa i përket importeve, produktet minerale përbëjnë 19.8 për qind të totalit. Pas tyre janë ushqimet e përgatitura, pijet dhe duhani me 13.1 për qind, mjetet e transportit me 11.7 për qind, makineritë, pajisjet mekanike dhe elektrike me 11.5 për qind, si dhe metalet bazë dhe artikujt prej tyre me 8 për qind.
Eksportet e Kosovës në vendet e BE-së arritën në 30 milionë euro, ose rreth 30,2% e eksporteve të përgjithshme, me një rritje prej 29,8%. Partnerët kryesorë për eksportin e mallrave në BE ishin: Gjermania (10,2%), Italia (3,0), Holanda (2,2%), etj.
Importet e Kosovës nga vendet e BE-së ishin rreth 279 milionë euro, ose 41,7% e importeve të përgjithshme, me një rritje prej 6,6%. Importet me pjesëmarrje me të lartë ishin nga: Gjermania (13,6%), Italia (4,2%), Polonia (3,7%), etj.
The post Kosova regjistroi deficit tregtar prej 568 milionë eurosh në muajin gusht appeared first on Gazeta Express.
