Albin Kurti, kryeministër në detyrë i Kosovës, ka deklaruar se vendi është plotësisht i rreshtuar me politikën e jashtme dhe të sigurisë së Bashkimit Evropian.
Deklarata u bë pas takimit që ai zhvilloi në Prishtinë me Komisioneren për Zgjerim të BE-së, Marta Kos, e cila po qëndron për vizitë zyrtare në Kosovë.
Në takime të ndara, ajo është pritur edhe nga ushtruesja e detyrës së presidentes, Albulena Haxhiu.
Pas përfundimit të takimit dhe konferencës për media, Kurti e cilësoi bisedën me Komisioneren Kos si konstruktive dhe të drejtpërdrejtë, duke theksuar se është diskutuar progresi i Kosovës në vitet e fundit në fushën e demokracisë, ekonomisë dhe procesit të integrimit evropian.
Ai tha se Kosova renditet e treta në mesin e 15 shteteve të Evropës Juglindore dhe e dyta në mesin e gjashtë vendeve të Ballkanit Perëndimor sa i përket avancimit në sundimin e ligjit.
Kurti gjithashtu theksoi se Kosova ka dënuar agresionin rus në Ukrainë “në terma më të ashpër”, ka ofruar strehim për gazetarët ukrainas dhe i është bashkuar të gjitha sanksioneve të Bashkimit Evropian ndaj Federatës Ruse.
