Policia e Kosovës, ka njoftuar për disa kontrolle që janë kryer në shkolla të Mitrovicës së Jugut, dhe në të Skenderajt, ku është konfiskuar edhe një armë zjarri nga një nxënës.
Në njoftim shtohet se, tek nxënësi i shkollës së mesme të lart në Skenderaj, ku kontrolli është kryer nga vetë stafi i shkollës atje, është gjetur arma, 19 fishekë, një gëzhojë dhe një predhë e armës së gjatë.
‘’Policia ka konfiskuar të gjitha gjësendet e dyshuara dhe të dy nxënësit janë shoqëruar në stacion policor’’, thuhet mes tjerash në njoftim, përcjell Gazeta Express.
Komunikata:
Realizohen kontrolle në shkolla, konfiskohet një armë zjarri nga një nxënës i shkollës së mesme në Skenderaj
Mitrovicë Jug/Skenderaj, 20 maj 2026
Në kuadër të angazhimeve të vazhdueshme për parandalimin e dukurive negative dhe rritjen e sigurisë në shkolla dhe përreth tyre, Policia në rajonin e Mitrovicës ka planifikuar dhe ka realizuar kontrolle të kohëpaskohshme nëpër shkolla.
Në bazë urdhëresës së lëshuar nga Gjykata kompetente, policia gjatë javës së kaluar ka realizuar kontrolle në tri shkolla të mesme të larta në Mitrovicë Jug ku janë kontrolluar 460 nxënës mirëpo tek nxënësit nuk është gjetur asnjë mjet i rrezikshëm apo i kundërligjshëm.
Sot, në njërën nga shkollat e mesme të larta në Skenderaj është realizuar një kontroll i nxënësve nga vet stafi i shkollës dhe pas përfundimit të kontrollit, njësia policore për sigurinë në shkolla është njoftuar nga drejtori i shkollës se gjatë kontrollit tek dy nxënës janë gjetur mjete të rrezikshme.
Tek një nxënës është gjetur një mjet i mprehtë (thikë), ndërsa tek një nxënës tjetër janë gjetur:
• një armë zjarri e llojit pistoletë;
• 19 fishekë;
• një gëzhojë;
• një predhë e armës së gjatë.
Policia ka konfiskuar të gjitha gjësendet e dyshuara dhe të dy nxënësit janë shoqëruar në stacion policor.
Të njëjtit janë intervistuar në prani të prindërve dhe mbrojtësve të tyre. Pas njoftimit të prokurorit për të mitur, me vendim të tij nxënësit janë liruar në procedurë të rregullt, ndërsa ndaj nxënësit tek i cili është gjetur arma e zjarrit është iniciuar rasti për veprën penale: “Mbajtje në pronësi, kontroll ose posedim të paautorizuar të armëve”.
Kontrolle të tilla do të realizohen edhe në të ardhmen andaj Policia apelon tek të gjithë nxënësit që të mos bartin armë dhe mjete të rrezikshme pasi që veprime të tilla paraqesin rrezik serioz për sigurinë dhe janë të ndaluara me ligj.
The post Kontrolle në shkolla të Mitrovicës së Jugut e Skenderajt, gjenden armë zjarri e thikë- Policia jep detaje appeared first on Gazeta Express.
