Ulja graduale e pranisë së KFOR-it mbi urën e Ibrit ishte në fokus të takimit ndërmjet komandantit të KFOR-it, Ozkan Ulutash, dhe kryetarit të Listës Serbe, Zlatan Elek.
Në takimin e zhvilluar në selinë e KFOR-it në “Film City”, Ulutash bëri të qartë se procesi i optimizimit të pranisë së misionit tashmë ka nisur, por nuk nënkupton tërheqje nga veriu i Kosovës.
Sipas KFOR-it, palët diskutuan për një sërë çështjesh, përfshirë situatën e sigurisë në veri të Kosovës dhe zbatimin e procesit të paralajmëruar për optimizimin e pozicionimit të KFOR-it.
Komandanti i KFOR-it u tha përfaqësuesve të Listës Serbe se procesi i optimizimit është nisur si rezultat i përmirësimit të situatës së sigurisë në Kosovë.
Ai theksoi se procesi do të zhvillohet gradualisht dhe do të jetë i bazuar në kushtet në terren, ndërsa trupat mund të rikthehen nëse zhvillimet e ardhshme ndikojnë në sigurinë e qëndrueshme në Kosovë dhe stabilitetin rajonal.
KFOR-i tha se do të mbetet i pajisur dhe i pozicionuar për t’iu përgjigjur çdo zhvillimi relevant.
“Tranzicioni gradual i pranisë së KFOR-it nga ura kryesore në Mitrovicë është në fazën fillestare”, thuhet në komunikatën e këtij misioni.
KFOR-i theksoi se, edhe pas përfundimit të procesit, do të mbajë një prani të fuqishme në Mitrovicën e Veriut dhe në pjesën veriore të Kosovës. Por duket që ky qëndrim nuk i ka pëlqyer aspak presidentit të Serbisë, Aleksandër Vuçiq.
Gjatë një vizite te punimet në një hidrocentral në Arilje, Vuçiq ka përmendur komunikim e shefit të Shtabit të Përgjithshëm të Ushtrisë së Serbisë, Milan Mojsilloviq me komandantin e KFOR-it, Ulutash, të cilën e ka cilësuar si bisedën më të keqe që Mojsilloviqi ka pasur me të deri më tani.
Paraprakisht, Vuçiqi kishte njoftuar të hënën se Mojsilloviqi do të diskutonte me Ulutashin për vendimin e KFOR-it për të reduktuar praninë e përhershme në urën kryesore mbi lumin Ibër në Mitrovicë.
“Mojsilloviqi ka biseduar me njerëzit e KFOR-it, me komandantin Ulutash, një turk, i cili tha: Nuk ka problem, Policia e ashtuquajtur e Kosovës do të punojë së bashku me ne…?. Vërtetë, nuk ka problem? Mirë, tani e kuptojmë pse bëtë gjithçka që bëtë në vitin 1999. E kuptojmë gjithçka dhe nuk ka ndonjë filozofi të madhe, gjithçka është në rregull”, ka thënë Vuçiq.
Sipas tij, kjo bisedë i ka bërë të qartë Serbisë “me kë ka të bëjë”, ndërsa KFOR-in e akuzoi se nuk është i sinqertë në qasjen ndaj dialogut, duke thënë: Thjesht ndaloni së pretenduari se jeni aty për ndonjë lloj dialogu apo për çfarëdo tjetër, sepse nuk jeni në favor të dialogut.
Të hënën, KFOR-i njoftoi se ka nisur gradualisht tërheqjen e pranisë së përhershme nga ura kryesore mbi lumin Ibër në Mitrovicë.
Procesi, tha KFOR-i të hënën, do të bëhet në bazë të kushteve dhe në koordinim të ngushtë me të gjithë akterët relevantë, përfshirë përfaqësuesit e institucioneve të Kosovës dhe të organizatave ndërkombëtare, si dhe me Policinë e Kosovës dhe EULEX-in.
Derisa në përgjigje thuhet se për këtë çështje, shefi i Shtabit të Përgjithshëm të Ushtrisë së Serbisë, gjenerali Milan Mojsilloviq, është informuar rregullisht për këtë proces.
Largimi gradual i pjesëtarëve të KFOR-it nga ura pas 27 vjetësh do të zëvendësohet nga pjesëtarë të Policisë së Republikës.
The post KFOR-i nis tranzicionin gradual, prani e fuqishme mbetet në veri appeared first on Gazeta Express.
