Katër punëtorë vdesin pasi u përplasën nga treni në Japoni

Katër punëtorë kanë humbur jetën pasi u goditën nga një tren në stacionin Shin-Kanuma, në veri të Tokios, në Japoni.

Aksidenti ndodhi rreth orës 10:46 sipas kohës lokale, teksa punëtorët po largonin barërat e këqija nga shinat. Kur ekipet e emergjencës mbërritën në vendngjarje, tre prej tyre ishin të bllokuar nën tren, ndërsa një tjetër ndodhej në platformë.

Si pasojë e aksidentit, shërbimi hekurudhor në linjën Tobu Nikko u pezullua.

Një pasagjer në tren tha se kishte dëgjuar një “zhurmë të çuditshme” para se treni të ndalonte urgjentisht.

Autoritetet po hetojnë shkaqet e aksidentit. Sipas kompanisë hekurudhore Tobu Railway, zakonisht një punëtor qëndron pranë shinave për të paralajmëruar ekipet për afrimin e trenave, por ende nuk është e qartë se çfarë ndodhi në momentin e aksidentit, shkruan BBC.

The post Katër punëtorë vdesin pasi u përplasën nga treni në Japoni appeared first on Gazeta Express.