Izraeli ka nisur një valë intensive sulmesh në zona të gjera të jugut dhe lindjes së Libanit, pasi u zotua se do të rrisë veprimet ushtarake kundër Hezbollahut.
Ushtria izraelite tha se ka goditur më shumë se 100 objekte infrastrukturore të Hezbollahut dhe luftëtarë, gjatë asaj që u konsiderua një nga netët më të rënda të bombardimeve që nga hyrja në fuqi e një armëpushimi të ndërmjetësuar nga SHBA-ja në mesin e prillit, shkruan BBC, transmeton Dukagjini.
Sulmet në fshatin Mashghara në Luginën Bekaa kanë vrarë 11 persona, përfshirë dy fëmijë, sipas Ministrisë së Shëndetësisë së Libanit.
Ushtria izraelite tha se ka goditur objektiva ku ishte identifikuar “aktivitet terrorist”.
Ngjarja ndodhi pasi kryeministri izraelit Benjamin Netanyahu deklaroi se kishte urdhëruar që “të shtypej edhe më fort pedali” në sulmet ndaj Hezbollahut.
Armëpushimi është shkelur vazhdimisht nga të dyja palët, duke rrezikuar negociatat komplekse për t’i dhënë fund luftës mes SHBA-së, Izraelit dhe Iranit.
Sulmet ajrore dhe artilerike izraelite kanë vazhduar çdo ditë, veçanërisht në jug të Libanit, ndërsa Hezbollahu ka lëshuar raketa dhe dronë drejt komuniteteve në veri të Izraelit dhe ndaj trupave izraelite në jug të Libanit.
Të hënën në mbrëmje, Netanyahu deklaroi në një video se Izraeli do të rrisë numrin dhe intensitetin e sulmeve kundër Hezbollahut, në përgjigje të sulmeve të grupit të mbështetur nga Irani, përfshirë përdorimin e dronëve me fibër optike që shmangin mbrojtjen izraelite.
“Do t’u japim një goditje shkatërruese,” tha ai.
Deklarata shkaktoi panik në periferitë jugore të Bejrutit, një bastion i Hezbollahut, ku banorët u panë duke u larguar me shpejtësi nga zona. Mijëra makina mbushën rrugët ndërsa familjet tentonin të largoheshin për siguri.
Edhe pse sulmet gjatë natës nuk prekën kryeqytetin, avionët luftarakë izraelitë kryen valë të njëpasnjëshme bombardimesh në të gjithë Libanin gjatë mbrëmjes dhe orëve të para të mëngjesit.
Një burrë dhe gruaja e tij u vranë në një sulm ndaj shtëpisë së tyre në qytetin jugor Arab Salim, ndërsa dy persona të tjerë u vranë në fshatin Kauthariyet El Rez, sipas agjencisë shtetërore NNA.
Gjatë natës, disa shtëpi në Mashghara u shkatërruan nga sulmet izraelite. Pamje të paverifikuara në rrjete sociale tregonin rrugë me ndërtesa të shkatërruara dhe të djegura.
Ministria e Shëndetësisë së Libanit tha se trupat e 11 personave, përfshirë një grua dhe dy fëmijë, u nxorën nga rrënojat. Edhe 15 persona të tjerë u plagosën.
Ushtria izraelite publikoi gjithashtu pamje ajrore nga Mashghara, duke thënë se ato tregonin sulme ndaj “objekteve të infrastrukturës së Hezbollahut ku ishte identifikuar aktivitet terrorist”. “Gjatë sulmit, terroristët u eliminuan,” shtoi ajo.
Ushtria tha gjithashtu se ka goditur mbi 90 depo armësh, qendra komandimi, pika vëzhgimi dhe objekte të tjera të përdorura nga Hezbollahu në jug të Libanit gjatë natës.
Të martën në mëngjes, ushtria lëshoi urdhra të rinj evakuimi në të gjithë Libanin, duke akuzuar Hezbollahun për shkelje të kushteve të armëpushimit që hyri në fuqi më 17 prill.
Zëdhënësi i ushtrisë në gjuhën arabe, koloneli Avichay Adraee, tha se shkeljet e përsëritura të Hezbollahut nuk i kishin lënë forcave izraelite zgjidhje tjetër veçse të vepronin.
Hezbollahu tha se ka goditur tre baza ushtarake dhe një post ushtarak në veri të Izraelit “në përgjigje të shkeljes së armëpushimit” nga Izraeli.
Urdhri i Netanyahut për intensifikimin e sulmeve erdhi pasi ushtria izraelite tha se një ushtar ishte vrarë në jug të Libanit të dielën, duke e çuar në 23 numrin e ushtarëve izraelitë të vrarë që nga fillimi i konfliktit më 2 mars, së bashku me një kontraktor civil.
Ministria e Shëndetësisë së Libanit thotë se sulmet izraelite gjatë së njëjtës periudhë kanë vrarë të paktën 3,185 persona.
