Rrugën të premten e mori për tek shtëpia e familjes Ademi në Prishtinë.
E në hyrje të saj, dolën për ta pritur burrat e kësaj familje.
Për ta, imami Nexhmi Hoxha, ka një urim të veçantë.
Kjo pasi katër burrat e kësaj familje, pas pak do të nisën në udhëtimin më të veçantë të jetës së tyre.
Bëhet fjalë për atë drejt Mekës, për ta kryer obligimin e haxhit.
“Unë nuk mundem me gjete shprehje se si po ndihem tash, është një ndjenjë që sa herë po mendoj që kemi me shku bashkë po ndjehem me disa emocione në vetë që qysh ka me u krye, qysh ka me u kënaq”, thotë hoxha Zejnullah Ademi.
Zejnullah Ademi, tregon se si e pritën lajmin vëllëzërit e tjerë.
“Atëherë kur kam qenë në 2022, vëllezërit por edhe disa kushërinj që i kemi aty në fshat më kanë thanë kur shkon hoxha kemi me shku edhe na herën tjetër me ty, më kanë lanë këtë fjalë kështu. E kur deshti Zoti e hyra në listë dhe e shënova emrin ju tregova, ata me padurimi e pritën këtë lajm të mirë e që ju thash po shkojë, edhe të tre vëllezërit e mijë ë, por edhe ata kushërinj e mi në fshat”.
Dëshira e madhe për të qenë bashkë më vëllezërit, bëri që ftesës së t’i përgjigjet edhe Ruzhdiu.
“Obligimi që është për ata që i kanë mundësitë, edhe është një prej shtyllave të fesë Islame. Pastaj edhe mundësitë materiale, po. Unë personalisht edhe një herë kam qenë më herët në haxh, po këtë vit organizuan tre vëllezërit e tjerë. Dëshira e madhe për të qenë bashkë me ta në një tubim në një vend të shenjtë edhe më tepër na shtyu me e marr këtë rrugë”.
E vëllai tjetër, Behrami, thotë se me këtë po e plotësojnë ëndrrën që e kishin prindërit e tyre.
“Unë jetoj në Londër për momentin, kështu që si më ka thirr në telefon thash po menjëherë, ne jemi të gatshum i ka thirr edh vëllezërit e tjerë. Së bashku jemi bë, është një plotësim i dëshirës së prindërve tonë që kanë pas neve më na bashku e me marr një udhëtim të shenjtë. Nuk mundemi hale ne me paramendua qysh është pa shku atje”, thotë ai.
Për këtë, të premten në familjen Ademi, emocionet i përfshinë edhe familjarët e tjerë.
“Është një emocion i veçantë edhe pse vet nuk po udhëtoj. Por pse është emocion , është se ka qenë një ëndërr e imja e kamotshme me shku bashkë me ta në haxh. Edhe pse nuk po jem unë me ta, nuk na mundësoi Zoti me kanë bashkë me ta, si ëndërr po plotësohet dhe kjo për mua është një ndjenjë e emocion i veçantë”, u shpreh familjari Ferid Ademi.
Haxhi është shtylla e pestë e besimit në fenë Islame.
Ndërsa është obligim ta kryer për ata që i kanë mundësitë financiare.
