Gjykata Supreme e Pakistanit ka urdhëruar transferimin e ish-kryeministrit Imran Khan nga burgu Adiala në Raëalpindi në spitalin Shifa International në Islamabad, brenda dy ditësh. Vendimi u mor të martën nga një trup gjykues prej tre anëtarësh, pas kërkesave të vazhdueshme të familjes dhe partisë së tij Pakistan Tehreek-e-Insaf (PTI) për trajtim të specializuar jashtë burgut.
Sipas avokatit të Khanit, Uzair Bhandari, gjykata ka urdhëruar gjithashtu krijimin e një bordi mjekësor, që do të mbikëqyrë trajtimin e tij. Në bord do të jenë edhe motra e Khanit, Dr Uzma Khan, dhe mjeku i tij personal, Dr Faisal Sultan. Gjykata ka vendosur që familjarët të lejohen ta vizitojnë në spital dhe që ai të ketë mundësi të komunikojë me djemtë e tij, të cilët jetojnë jashtë Pakistanit.
Seanca e radhës është caktuar për në 16 shtator dhe, sipas avokatit, Khan pritet të qëndrojë i shtruar në spital të paktën deri atëherë. Kjo do të ishte periudha më e gjatë që ai do të qëndronte fizikisht jashtë ambienteve të burgut që prej arrestimit në gusht të vitit 2023.
Vendimi erdhi pas një raporti të dorëzuar nga drejtori i burgut Adiala, ku përfshihej edhe vlerësimi i një bordi kardiologjik më 10 gusht. Raporti evidentonte luhatje të presionit të gjakut dhe ankth, të lidhur me kufizimin e kontakteve me familjen. Gjatë seancës, gjykata shprehu shqetësim për gjendjen shëndetësore të Khanit dhe kritikoi mangësitë në raportin mjekësor.
Kërkesat për transferimin e tij në spital ishin refuzuar më parë në dy raste që nga shkurti. PTI ka argumentuar prej muajsh se trajtimi brenda sistemit penitenciar nuk mund të zëvendësojë një vlerësim të plotë nga mjekë të pavarur dhe specialistë të zgjedhur nga familja e Khanit.
Qeveria pakistaneze, ndërkohë, ka insistuar se ish-kryeministri po merr trajtimin më të mirë të mundshëm brenda sistemit të burgjeve. Këshilltari i kryeministrit Shehbaz Sharif, Rana Sanaullah, tha se gjendja e Khanit nuk justifikonte shqetësimet e ngritura nga PTI.
Transferimi vjen në një periudhë të tensionuar politike në Pakistan. PTI e ka lidhur përmirësimin e kontakteve me Khanin me mundësinë e rifillimit të dialogut me qeverinë. Partia ka paralajmëruar gjithashtu një protestë mbarëkombëtare më 27 shtator, duke kërkuar respektimin e asaj që e konsideron si mandat të vjedhur në zgjedhjet e vitit 2024. Megjithatë, PTI u ka bërë thirrje mbështetësve të mos mblidhen pranë spitalit Shifa International dhe të ruajnë një atmosferë paqësore gjatë trajtimit të Khanit.
Vendimi i Gjykatës Supreme ka ngritur edhe spekulime për një ulje të tensioneve mes qeverisë dhe PTI-së. Analistët vlerësojnë se, në kushtet e problemeve të sigurisë në Balochistan dhe protestave në Kashmirin e administruar nga Pakistani, qeveria mund të ketë interes të shmangë një përplasje të re me opozitën.
Megjithatë, çdo marrëveshje politike mbetet e pasigurt. Imran Khan vazhdon të jetë figura qendrore e PTI-së dhe çdo marrëveshje e rëndësishme mes qeverisë dhe partisë opozitare do të kërkonte miratimin e tij. Vendimi për transferimin në spital mund të shënojë një hap të rëndësishëm drejt përmirësimit të kushteve të tij, por mbetet për t’u parë nëse kjo do të çojë edhe në një zbutje të konfliktit të gjatë politik në Pakistan.
The post Ish-kryeministri pakistanez Imran Khan s’ndihet mirë në burg, do lërë qelinë për t’u trajtuar në spital appeared first on Gazeta Express.
