Prokurorët deklaruan të premten se në librin e John Boltonit nuk është publikuar asnjë informacion i klasifikuar. Në vend të kësaj, aktakuza ndaj tij përqendrohet te shënimet që ai dyshohet se ua ka ndarë bashkëshortes dhe vajzës së tij, e jo te përmbajtja e librit.
Pasi kishte dërguar një dokument, Bolton u kishte shkruar familjarëve në një mesazh: **”Për asgjë nga këto nuk flasim!”**. Njëri prej tyre iu përgjigj: **”Shhhh”**, thanë prokurorët, raporton SkyNews.
Bolton, ish-këshilltar për siguri kombëtare i presidentit amerikan Donald Trump dhe tashmë një kritik i zëshëm i tij, u deklarua fajtor të premten për një pikë të vetme të akuzës për mbajtje të paligjshme të informacionit të klasifikuar, gjatë një seance në një gjykatë federale në shtetin e Marylandit.
77-vjeçari i tha gjykatësit: “Më vjen keq për këtë.”
Marrëveshja e tij me Departamentin e Drejtësisë mund t’i mundësojë shmangien e një dënimi me burg, megjithëse vendimin përfundimtar do ta marrë gjykatësi i qarkut, Theodore Chuang, në seancën e caktuar për 28 tetor.
Marrëveshja rekomandon që çdo dënim me burg të mos kalojë pesë vjet. Bolton gjithashtu do të paguajë një gjobë prej **2.25 milionë dollarësh** (rreth **1.7 milionë paundësh**).
Ai ka të drejtë të tërheqë pranimin e fajësisë nëse gjykatësi vendos një dënim më të rëndë me burg ose një gjobë më të madhe.
Bolton kishte akuzuar më herët Donald Trumpin se po përpiqej të **”frikësonte kundërshtarët e tij”** pasi ishte paditur penalisht.
Si arriti çështja deri këtu?
Bolton u akuzua në tetor të vitit të kaluar për 18 vepra penale që lidhen me mbajtjen ose shpërndarjen e informacionit të klasifikuar. Akuzat përfshijnë edhe shënime të ngjashme me një ditar, të cilat ai ua kishte ndarë familjarëve gjatë kohës kur po shkruante kujtimet për periudhën e tij në qeveri.
Agjentët e FBI-së bastisën shtëpinë e Boltonit në Maryland dhe zyrën e tij në Uashington në gusht të vitit të kaluar. Megjithatë, hetimi kishte nisur përpara rikthimit të Donald Trumpit në Shtëpinë e Bardhë në janar të vitit 2025.
Bolton shërbeu për më shumë se një vit në administratën e parë të Trumpit, përpara se të largohej nga posti në vitin 2019.
Një vit më vonë ai botoi librin **”The Room Where It Happened”**, në të cilin paraqiti një portret kritik të udhëheqjes së Donald Trumpit.
Administrata Trump ishte përpjekur pa sukses të ndalonte botimin e librit, duke pretenduar se ai përmbante informacione të klasifikuara që mund të rrezikonin sigurinë kombëtare.
Megjithatë, prokurorët thanë të premten se libri nuk përmbante informacione të klasifikuara. Sipas tyre, çështja penale lidhet me shënimet që Bolton dyshohet se ua kishte ndarë bashkëshortes dhe vajzës së tij, e jo me përmbajtjen e librit.
Fillimisht, vitin e kaluar, Bolton ishte deklaruar i pafajshëm ndaj të gjitha 18 akuzave penale.
