Instituti për Studime të Luftës Hibride “Octopus” dhe Instituti Bullgar për Politikë Ndërkombëtare (BIIP) kanë nënshkruar të mërkurën një Memorandum Mirëkuptimi, duke krijuar një kornizë të re bashkëpunimi në fushën e hulumtimit dhe analizës së politikave.
Memorandumi është nënshkruar nga drejtori i Institutit “Octopus”, Arben Fetoshi, dhe anëtari i Bordit Drejtues të Institutit Bullgar për Politikë Ndërkombëtare, Dr. Dimitar Keranov.
Marrëveshja parasheh zhvillimin e nismave të përbashkëta kërkimore dhe analizave krahasuese të politikave, hartimin e dokumenteve dhe raporteve analitike, si dhe shkëmbimin e hulumtimeve, publikimeve dhe materialeve të tjera profesionale ndërmjet dy institucioneve.
Bashkëpunimi do të përfshijë gjithashtu organizimin dhe pjesëmarrjen e përbashkët në konferenca, tryeza diskutimi, panele ekspertësh, webinare dhe aktivitete publike, përfshirë konferenca akademike që trajtojnë kërcënimet hibride dhe sigurinë rajonale.
Në memorandum parashihet edhe angazhimi i studiuesve dhe ekspertëve të dy institucioneve në aktivitete, publikime dhe programe të përbashkëta, si dhe bashkëpunimi në aplikime për grante dhe propozime projektesh për donatorë ndërkombëtarë.
Pjesë e bashkëpunimit do të jenë edhe shkëmbimet akademike dhe shqyrtimi i mundësive për vizita të ekspertëve, me synim forcimin e lidhjeve profesionale dhe kërkimore ndërmjet Kosovës dhe Bullgarisë.
Sipas memorandumit, të dy institucionet ruajnë pavarësinë e plotë institucionale, lirinë editoriale dhe autonominë kërkimore, ndërsa marrëveshja nuk i obligon palët që të mbështesin apo miratojnë qëndrimet dhe gjetjet e njëra-tjetrës.
Memorandumi ndërmjet Institutit për Studime të Luftës Hibride “Octopus”, me seli në Prishtinë, dhe Institutit Bullgar për Politikë Ndërkombëtare (BIIP), me seli në Varna, është nënshkruar më 23 shtator 2026 dhe do të jetë në fuqi për një periudhë pesëvjeçare, me mundësi vazhdimi me marrëveshje të ndërsjellë.
