Tetë punëtorë humbën jetën dhe gjashtë të tjerë mbetën të plagosur pas një aksidenti të rëndë në një fabrikë çeliku në shtetin Andhra Pradesh të Indisë jugore, njoftuan autoritetet të hënën.
Sipas raportimeve, ngjarja ndodhi në Uzinën e Çelikut Vizag, kur një sasi e madhe hekuri të shkrirë u derdh nga një kovë që po transportohej me vinç. Temperatura e materialit të shkrirë vlerësohej të ishte rreth 1,600 gradë Celsius.
Ekipet e emergjencës dhe autoritetet lokale ndërhynë menjëherë në vendngjarje, ndërsa të plagosurit u dërguan për trajtim mjekësor.
Kryeministri i Andhra Pradesh, Chandrababu Naidu, deklaroi se ka udhëzuar zyrtarët përkatës të ndërmarrin të gjitha masat e nevojshme dhe të sigurojnë ndihmë të menjëhershme për personat e prekur nga tragjedia.
Ndërkohë, kryeministri indian Narendra Modi shprehu ngushëllimet e tij për familjet e viktimave.
“Jam i trishtuar nga humbja e jetëve në këtë incident. Ngushëllime për ata që kanë humbur të dashurit e tyre dhe lutem për shërimin e shpejtë të të plagosurve”, tha Modi, duke shtuar se autoritetet lokale po ofrojnë të gjithë ndihmën e mundshme për të prekurit.
Autoritetet kanë nisur hetimet për të përcaktuar shkaqet e aksidentit industrial./EN
