Një person është plagosur mbrëmë në rrugën “Ali Sokoli” në Prishtinë.
Sipas njoftimit nga Policia, informatat për të shtëna në këtë rrugë i kanë marrë rreth orës 21:40.
Pas daljes në vendin e ngjarjes, Policia thotë se një person është plagosur dhe është dërguar për trajtim mjekësor.
“Rreth orës 21:40 kemi marrë informatën për të shtëna me armë zjarri,në rrugën “Ali Sokoli” në Prishtinë. Njësitet policore menjëherë kanë dalë në vendin e ngjarjes, nga ku është raportuar se një person është plagosur. Personi i plagosur, (mashkull), është dërguar për trajtim mjekësor, ndërkohë policia ka nisur një hetim lidhur me rrethanat e këtij rasti”, ka thënë Enis Pllana, zëdhënës i Policisë në rajonin e Prishtinës.
I plagosuri është emër i njohur për organet e rendit.
Harbin Vitija, i njohur me nofkën “Plaku i Bregut”, ka mbetur i plagosur të enjten mbrëma në lagjen “Bregu i Diellit” në Prishtinë, pak kohë pasi ishte liruar nga burgu.
Siç raportoi Reporteri rasti ka ndodhur vetëm rreth 100 metra larg vendit ku në vitin 2024 ai kishte qëlluar me kallashnikov në drejtim të disa personave, pas një mosmarrëveshjeje paraprake.
Vitija, 25 vjeç, është përfshirë në disa raste penale ndër vite. Sipas të dhënave, ai nga viti 2016 është përballur me akuza të ndryshme që lidhen me botën e krimit.
“Vrasje në tentativë”, “lëndim i rëndë trupor”, “posedim i paautorizuar i narkotikëve”, “mbajtje pa leje e armës” dhe “shkaktim i rrezikut të përgjithshëm” janë disa nga veprat për të cilat është dyshuar apo dënuar më herët.
Në një rast, për veprën penale “vrasje në tentativë”, atij i ishte shqiptuar edhe dënim me burgim dhe gjobë, ndërsa rasti më vonë kishte shkuar në rigjykim. Ai ishte arrestuar sërish me urdhër të gjykatës në vitin 2022 për vuajtje të dënimit të mëparshëm.
Ndër rastet e përmendura në dosjet e tij është edhe incidenti i korrikut 2016 në festivalin “Beer Fest” në sheshin “Nëna Tereza” në Prishtinë, ku dyshohet se kishte shtënë me armë zjarri, duke shkaktuar panik dhe lëndime tek qytetarët.
Po ashtu, në qershor të vitit 2020, ai ishte përfshirë në një rast tjetër të dhunshëm në një lokal në Prishtinë, ku pas një mosmarrëveshjeje dyshohet se kishte sulmuar një person me mjet të mprehtë, duke i shkaktuar lëndime të rënda trupore.
Në vitin 2024, Vitija ishte sërish i përfshirë në një rast të vrasjes në tentativë, ku dyshohet se kishte shtënë me armë zjarri në drejtim të një grupi personash.
Autoritetet e drejtësisë e kanë konsideruar atë si recidivist, gjë që ishte konfirmuar edhe nga kryeprokurori i Prokurorisë Themelore në Prishtinë.
Në vitin 2025 teksa po vuante dënimin në burgun e Dubravës, ai ishte therur me thikë nga një i burgosur tjetër.
The post I përfshirë në disa vepra penale, plagosja në Prishtinë e 25 vjeçarit që sapo ishte liruar nga burgu – çka dihet deri më tani appeared first on Gazeta Express.
