Anëtari i Lidhjes Demokratike të Kosovës, Muhamet Hamiti, ka komentuar kritikat që po u bëhen 6 deputetëve të LDK-së, të cilët kanë kundërshtuar votimin e Bekim Sejdiut për president.
Ai ka thënë se si është e mundur që 6 deputetë mund ta dërgojnë vendin në zgjedhje, kur janë një e njëzeta e deputetëve të Kuvendit të Kosovës.
“Kuvendi i Republikës së Kosovës i ka 120 deputetë. Për zgjedhje të Presidentit të vendit, dy të tretat e deputetëve mjaftojnë, domethanë 80 deputetë. Qysh, me mosvotim po e dërguakan vendin në zgjedhje të parakohshme 6 deputetë?! Një e njëzeta e deputetetëve të Kuvendit. 104 a 114 të tjerë s’po e bëkan kuorumin prej 80 deputetësh?”, ka shkruar ai.
Të hënën, Abdixhiku e Kurti treguan se janë marrë vesh që Bekim Sejdiu të jetë i propozuari i tyre për president të vendit, por që këtë e bënë pa u marrë vesh më herët me grupin parlamentar. E për t’u marrë vesh, një takim u mbajt të martën, por që Avdullah Hoti, Hykmete Bajrami, Arben Gashi, Armend Zemaj, Janina Ymeri dhe Kujtim Shala dolën kundër votimit të Bekim Sejdiut për president.
Menjëherë pas kësaj kanë filluar edhe sulmet ndaj këtyre deputetëve nga akterë të VV-së, të cilët 6-shen e LDK-së po e fajësojnë për dërgimin e vendit në zgjedhje.
The post Hamiti: Qysh 6 deputetë po e dërguakan vendin në zgjedhje, kur Kuvendi i ka 120 deputetë? appeared first on Gazeta Express.
