Deputeti i Partisë Demokratike të Kosovës tha se Lëvizja Vetëvendosje e ka shkelur Kushtetutën dhe interpretimet e Gjykatës Kushtetuese, megjithëse, përveç shkeljes së afatit për konstituimin e Kuvendit, tha se “është e ligjshme të mbahen seanca sepse Gjykata Kushtetuese ka thënë se Kuvendi duhet të themelohet, qoftë edhe pas afatit”.
Gruda tha në një konferencë për media në hollin e Kuvendit se LVV-ja nuk do ta konstituojë Kuvendin as më 7 shtator, sa tha dje zëvendëskryeministrja në detyrë, Donika Gërvalla se është afati.
“Zonja Gërvalla tha dje duhen 30 ditë nga nisja e sencës. Gjykata Kushtetuese ka thënë jo nga nisja, nga certifikimi i zgjedhjeve. Qartazi, shqipe e qartë: nga certifikimi i zgjedhjeve, 30 ditë, jo nga mbajtja e seancës”, tha ai.
“Ajo tha që duhet të themelohet më 7 shtator. Mbajeni pak për fjale, mbamëni edhe mua për fjale, që VV-ja nuk e bën as më 7 shtator Kuvendin”, tha Gruda.
Ai tha se LVV-ja nuk dëshiron ta konstituojë Kuvendin, “sepse i ka dy qëllime politike”.
“Ta mbajë Kosovën të bllokuar deri ditën kur pretendon ta marrë pushtetin absolut. Nëse në këtë rrugë nuk arrin ta marrë Presidentin, ata po duan ta çojnë vendin në zgjedhje në një datë që u konvenon atyre”, tha ai.
Me kërkesë të kryeministrit në detyrë, kryetarit të LVV-së, Albin Kurti, seanca konstituive e Kuvendit që nisi më 6 korrik është ndërprerë dy herë radhazi. Ai nuk e ka propozuar kandidatin për kryeparlamentar, siç kërkohet me Kushtetutë, pasi e konsideron të padobishme që të zgjidhet kryeparlamentari dhe nënkryetarët pa një marrëveshje paraprake për zgjedhjen e Presidentit.
Sipas një aktgjykimi të Gjykatës Kushtetuese, të premtën e javës së kaluar në mesnatë ka përfunduar afati për konstituimin e Kuvendit. Megjithatë, kryesuesi i seancës, Avni Dehari, deputeti më i vjetër i Kuvendit që vjen nga LVV-ja, e caktoi për të shtunën vazhdimin e seancës konstituive, e cila u ndërpre nga ai në po të njëjtën mënyrë si ditën kur ajo nisi.
Tani, LVV-ja thotë se nuk do të ketë vazhdim të seancës konstituive pa një marrëveshje paraprake për Presidentin, për zgjedhjen e të cilit është përcaktuar një afat kushtetues 60 ditor, i cili fillon të rrjedhë vetëm pasi të konstituohet Kuvendi.
The post Gruda: LVV s’e bën Kuvendin as më 7 shtator siç tha Gërvalla, duan Presidentin ose zgjedhje kur u konvenon atyre appeared first on Gazeta Express.
