Propaganda ruse nuk ndalet. Kësaj here, në shënjestër janë vendosur gratë ukrainase, fotot e të cilave po përdoren nga kanale proruse në Telegram për të përhapur pretendime të rreme për përdhunime, tortura dhe kapje robërish, me qëllim denigrimin e tyre dhe të Ukrainës.
Një hetim i BBC-së ka zbuluar një rrjet të gjerë kanalesh në Telegram që përdor fotografi reale të grave ukrainase, shumë prej tyre pjesëtare ose ish-pjesëtare të ushtrisë ukrainase, duke i shoqëruar ato me histori të sajuara për përdhunime dhe dhunë seksuale.
Një prej grave të përdorura në këtë fushatë është Keti Leshkasheli, një mjeke nga Gjeorgjia që kishte shërbyer në ushtrinë ukrainase. Fotoja e saj, e realizuar vite më parë ndërsa ishte me uniformë ushtarake në Avdiivka, u përdor në publikime ku pretendohej në mënyrë të rreme se ajo ishte kapur dhe përdhunuar.
BBC ka identifikuar më shumë se 20 gra fotot e të cilave janë përdorur si “karrem” në këtë fushatë, ndërsa ka intervistuar shtatë prej tyre.
Skema është e qartë: fotografitë e grave të vërteta publikohen së bashku me pretendime tronditëse për përdhunime dhe dhunë, ndërsa përdoruesve u premtohen edhe “video-prova”. Por kur klikojnë, videoja e premtuar nuk ekziston. Në vend të saj, përdoruesit dërgohen drejt kanaleve private në Telegram, të mbushura me përmbajtje pro-ruse dhe propagandë lufte.
Të dhënat e hetimit tregojnë për përmasat e kësaj makinerie propagandistike. BBC ka gjetur më shumë se 6,500 publikime që përdornin pretendime për sulme seksuale dhe që ishin shpërndarë nga rreth 1,700 kanale të vogla në Telegram. Së bashku, këto publikime kishin marrë rreth 65 milionë shikime.
Por propaganda nuk mjaftohet vetëm me gënjeshtra për dhunën seksuale. Në disa publikime, gratë ukrainase akuzohen gjithashtu në mënyrë të rreme se kanë torturuar ushtarë rusë apo kanë bërë thirrje për vrasjen e fëmijëve rusë. Këto pretendime shoqërohen me fyerje etnike dhe seksiste.
Sipas studiueses Valentina Shapovalova, e cila merret me dezinformimin me bazë gjinore, kjo fushatë e shndërron dhunën seksuale në një mjet për të tërhequr dhe monetizuar vëmendjen e publikut. Edhe kur këto publikime nuk prodhohen drejtpërdrejt nga shteti rus, ato, sipas saj, i shërbejnë objektivave të Kremlinit duke poshtëruar ukrainasit dhe duke normalizuar dhunën seksuale ndaj atyre që paraqiten si “armiq”.
Rrjeti duket se është edhe një biznes fitimprurës. Një prej kanaleve më të mëdha, Prijamoj Efir Novosti, i tha BBC-së se tarifonte të paktën 500 mijë rubla, rreth 5 mijë euro, për një reklamë, ndërsa dy kanale të tjera kërkonin rreth 40 mijë rubla.
Disa nga kanalet që promovojnë këtë përmbajtje paraqiten si media informative, por përsërisin narrativën zyrtare të Kremlinit, i përshkruajnë ofensivat ruse si “çlirim”, ndërsa Ukrainën dhe Perëndimin i paraqesin si agresorë. Dy prej tyre përdorin rregullisht edhe fyerje etnike ndaj ukrainasve.
Pavarësisht se mijëra publikime janë fshirë, propaganda vazhdon të shfaqet. Nga mbi 6,500 tituj klikbait të identifikuar nga BBC, rreth 5,400 ishin fshirë, por publikime të reja vazhdojnë të shfaqen. Disa prej tyre kanë shenja automatizimi, pasi i njëjti tekst, madje edhe me të njëjtat gabime drejtshkrimore, publikohet njëkohësisht në llogari të ndryshme.
Për gratë, pasojat janë reale. Lesia Palahnjuk, një këshilltare lokale ukrainase, fotografia e së cilës u përdor në këto publikime, tha se ekspozimi i tillë shkakton turp dhe vuajtje te gratë, ndonëse ato nuk kanë bërë asgjë të gabuar.
The post Gratë ukrainase në shënjestër të propagandës ruse: Fotot e tyre përdoren për gënjeshtra dhe poshtërim appeared first on Gazeta Express.
