Me rastin e shënimit të Ditës Ndërkombëtare të Familjes, ministrja në detyrë e Drejtësisë, Donika Gërvalla, ka theksuar se fuqizimi i familjes mbetet përgjegjësi shtetërore dhe themel për ndërtimin e një shoqërie më të qëndrueshme dhe më të sigurt.
Sipas saj, familja është hapësira e parë ku ndërtohen siguria, solidariteti, edukimi dhe dinjiteti njerëzor, prandaj meriton mbështetje të vazhdueshme institucionale.
Ajo ka thënë se mënyra se si një shtet kujdeset për familjen reflekton drejtpërdrejt qasjen ndaj drejtësisë shoqërore, barazisë dhe zhvillimit të së ardhmes.
Gërvalla ka nënvizuar se dhuna në familje, mungesa e mirëqenies ekonomike dhe mungesa e mbështetjes institucionale ndikojnë drejtpërdrejt në mirëqenien e fëmijëve, pozitën e grave dhe stabilitetin e shoqërisë.
Ajo bëri të ditur se gjatë viteve 2021–2025, Ministria e Drejtësisë e Kosovës ka ndërmarrë reforma në fushën e mbrojtjes sociale dhe familjare, duke e trajtuar mbrojtjen nga dhuna në familje dhe dhuna me bazë gjinore si prioritet shtetëror.
Sipas saj, për herë të parë është dyfishuar mbështetja financiare për strehimoret dhe organizatat që ofrojnë shërbime sociale dhe familjare, nga 880 mijë euro në vitin 2020 në 2.5 milionë euro në vitin 2025.
Po ashtu, ajo ka theksuar se janë fuqizuar mekanizmat për mbështetjen e fëmijëve pa përkujdes prindëror, janë rritur mbështetjet për familjet strehuese dhe është zgjeruar qasja në ndihmë juridike falas për kategoritë më të cenueshme.
Në deklaratën e saj, Gërvalla ka potencuar se dhuna në familje nuk duhet të trajtohet më si çështje private, por si çështje e sigurisë publike dhe e të drejtave themelore të njeriut.
Ajo u bëri thirrje institucioneve, komunave, shkollave dhe prindërve që të bashkëpunojnë në ndërtimin e mekanizmave të qëndrueshëm për parandalimin e hershëm të rrezikut dhe për forcimin e familjes.
“Sa më të forta familjet, aq më e qëndrueshme shoqëria, sa më e ulët dhuna, aq më të mëdha mundësitë për zhvillim dhe barazi. Përpjekja dhe angazhimi ynë institucional është i pareshtur, e i përditshëm në këtë drejtim”, ka deklaruar ajo./teve1.info/
