Mediat në Bosnje i kanë dhënë jehonë gërmimeve që po zhvillohen në veri të Kosovës për varreza masive të dyshuara se përmbajnë trupat e personave të zhdukur gjatë luftës së viteve 1998/99.
Media boshnjake Klix.ba ka sjellë rrëfimin për familjet që prej më shumë se dy dekadash presin të zbardhet fati i të afërmve të tyre, duke e lidhur këtë dhimbje me përvojën e Bosnjë-Hercegovinës, e cila, njësoj si Kosova, vazhdon të kërkojë trupat e personave të zhdukur gjatë luftës së shkaktuar nga forcat serbe.
Në fshatin Kalluder në veri të Kosovës, gërmimet për varreza masive të zbuluara rishtazi nisën në fund të korrikut, pasi në këtë zonë u gjetën eshtra njerëzore. Autoritetet e Kosovës dyshojnë se bëhet fjalë për mbetje mortore të personave të zhdukur gjatë luftës së viteve 1998/99.
Mes familjeve që presin me shpresë identifikimin e viktimave është edhe ajo e Erblin Ademit, i cili ishte vetëm nëntë vjeç kur pa për herë të fundit babanë e tij, Adem Ademin, një kirurg i njohur.
Adem Ademi u zhduk në prill të vitit 1999, së bashku me 22 intelektualë të tjerë, disa muaj para përfundimit të luftës. Për më shumë se dy dekada, familja e tij ka kërkuar pa sukses eshtrat e tij.
Vendndodhja ku po zhvillohen gërmimet është afër zonës ku Adem Ademi ishte parë për herë të fundit, ndaj familja tashmë ka një shpresë të matur se pas 27 vitesh mund të zbardhet fati i tij.
Gërmimet në Gornji dhe Donji Kalluder, në komunën e Zubin Potokut, nisën pasi u gjetën mbetje njerëzore në këtë zonë.
Kryeministri i Kosovës, Albin Kurti, ka deklaruar se autoritetet besojnë se në mesin e viktimave mund të jenë edhe intelektualët e zhdukur, të cilët dyshohet se u kapën ndërsa përpiqeshin të largoheshin nga Kosova për t’i shpëtuar forcave serbe.
Ademi ka thënë për Klix.ba se çdo njoftim për gërmime të reja sjell një përzierje shprese dhe dhimbjeje.
“Gjithmonë, kur dëgjojmë për fillimin e gërmimeve, ka një ndjenjë të përzier, një ndjenjë shprese dhe një ndjenjë dhimbjeje”, ka thënë ai, duke shtuar se dhimbja nuk zhduket edhe pas kaq shumë vitesh, por ekziston shpresa që e vërteta më në fund të zbulohet.
Sipas të dhënave të Fondit për të Drejtën Humanitare, rreth 1,200 shqiptarë, rreth 400 serbë dhe dhjetëra romë vazhdojnë të figurojnë si të zhdukur nga lufta në Kosovë.
Çështja e personave të zhdukur vazhdon të rëndojë edhe marrëdhëniet ndërmjet Kosovës dhe Serbisë. Edhe pse në maj të vitit 2023 të dyja palët arritën një marrëveshje që përfshinte detyrimin për të zbardhur fatin e të zhdukurve, Prishtina dhe Beogradi vazhdojnë të akuzojnë njëra-tjetrën për pengim të procesit.
Bekim Blakaj nga Qendra për të Drejtën Humanitare ka thënë se është e qartë se autoritetet nuk kanë qenë të gatshme të bashkëpunojnë sa duhet për zbardhjen e fatit të personave të zhdukur.
Ndërkohë, Policia e Kosovës njoftoi muajin e kaluar për arrestimin e dy serbëve të dyshuar për krime lufte të lidhura me varrezat masive, vetëm disa ditë para nisjes së gërmimeve të fundit.
Të dyshuarit vazhdojnë të qëndrojnë në paraburgim. Ndërkaq, një numër zyrtarësh të lartë politikë dhe ushtarakë serbë janë dënuar më herët për krime lufte nga gjykata e Kombeve të Bashkuara në Hagë.
The post Gërmimet në veri të Kosovës marrin jehonë në Bosnje: Familjet presin prej dekadash appeared first on Gazeta Express.
