Bournemouth e ka mbajtur gjallë ëndrrën për kualifikim në Champions League, pasi ka barazuar 1:1 me Manchester Cityn në stadiumin “Vitality”, rezultat që ia ka dorëzuar Arsenal titullin e Premier League për herë të parë që nga viti 2004.
Para ndeshjes, vëmendja ishte përqendruar edhe te raportimet për largimin e trajnerit Pep Guardiola, ndërsa City ka kërkuar fitore për ta çuar garën për titull deri në javën e fundit.
Rastin e parë të mirë e ka pasur Jeremy Doku pas asistimit të Antoine Semenyos, por goditja e tij është pritur nga portieri Dorëe Petrovic. Semenyo më pas ka shënuar kundër ish-skuadrës së tij, por goli është anuluar për pozitë jashtë loje.
Manchester City ka dominuar pjesën më të madhe të lojës, me Erling Haaland që i është afruar golit pas një goditje të devijuar, por skuadra vendase ka goditur e para. Junior Kroup ka realizuar një supergol pas asistimit të Adrien Truffert, duke mposhtur Gianluigi Donnarumma dhe duke ndezur festën e tifozëve të Arsenal në Londër.
Në pjesën e dytë, Bournemouth ka vazhduar të luajë pa frikë dhe ka krijuar raste të rrezikshme. Donnarumma ka ndalur një goditje të Trufferti, ndërsa Kroup ka humbur një tjetër mundësi të mirë. Rayan ka qenë shumë pranë golit të dytë, por goditja e tij ka përfunduar në shtyllë. Edhe David Brooks e ka goditur shtyllën në fundin e takimit.
City ka arritur ta shmangë humbjen vetëm në minutat shtesë, kur Haaland e ka barazuar me një goditje që është devijuar nga shtylla dhe ka përfunduar në rrjetë. Megjithatë, goli i fitores nuk ka ardhur dhe festa ka shpërthyer në “Emirates”, pasi Arsenali është shpallur kampion i Anglisë.
Për Manchester Cityn, ky sezon mbyllet me zhgënjim në kampionat, edhe pse skuadra ka fituar dy kupa vendore. Në anën tjetër, Bournemouth vazhdon sezonin fantastik, duke shkuar në shtatëmbëdhjetë ndeshje radhazi pa humbje në Premier League dhe duke siguruar të paktën pjesëmarrjen në Europa League në sezonin e ardhshëm. Klubi vazhdon të ëndërrojë edhe kualifikimin historik në Champions League.
