Komandanti i KFOR’it, Ozkan Ulutash, ka pritur sot në një takim shefen në detyrë të Zyrës së BE’së, Eva Palatova, në Shtabin e KFOR-it në Kampin “Film City” në Prishtinë.
KFOR në njoftim tha se “takimi ofroi mundësinë për të diskutuar për situatën e sigurisë në të gjithë Kosovën dhe për të forcuar koordinimin”.
“Komandanti i KFOR-it shprehu mirënjohjen e tij për bashkëpunimin e vazhdueshëm ndërmjet KFOR-it dhe Zyrës së BE-së në Kosovë”.
Takimi i tyre vjen pas deklaratës së BE’së se janë plotësuar kushtet për hapjen e Urës së Ibrit në Mitrovicë edhe për qarkullim të automjeteve, raporton Gazeta Express.
Gjithashtu, KFOR më herët ka deklaruar se ka nisur “tranzicionin gradual” të pranisë së tij të përhershme në urë.
KFOR-i përsëriti se vazhdon të zbatojë mandatin e tij, bazuar në Rezolutën 1244 të Këshillit të Sigurimit të OKB-së të vitit 1999, për të kontribuar në krijimin e një mjedisi të sigurt dhe të qetë për të gjithë njerëzit që jetojnë në Kosovë, si dhe për garantimin e lirisë së lëvizjes, në çdo kohë dhe në mënyrë të paanshme.
KFOR-i bashkëpunon ngushtë me Policinë e Kosovës dhe Misionin e Bashkimit Europian për Sundimin e Ligjit në Kosovë (EULEX), në kuadër të roleve të tyre përkatëse si reagues të sigurisë.
The post “Forcim i koordinimit”, Ulutash pret në takim Palatovën, a folën për Urën e Ibrit? appeared first on Gazeta Express.
