Emiratet e Bashkuara Arabe kanë deklaruar se një zjarr pranë centralit bërthamor të Barakah në Al Dhafra është shkaktuar nga një dron i lëshuar nga Irani ose nga grupe të lidhura me të, duke e cilësuar ngjarjen si “përshkallëzim të rrezikshëm”.
Sipas autoriteteve emirate, droni ka goditur një gjenerator elektrik jashtë perimetrit të brendshëm të centralit, ndërsa tre dronë thuhet se kanë hyrë në territorin e vendit nga drejtimi i kufirit perëndimor.
Nga incidenti nuk ka të lënduar dhe as rrezik radiologjik, raporton The Guardian.
Ministria e Mbrojtjes e Emirateve bëri të ditur se hetimet janë ende në vazhdim për të përcaktuar burimin e sulmit, ndërsa rezultatet do të publikohen më vonë.
Zyrtari i lartë presidencial Anwar Gargash tha se sulmi përbën një “përshkallëzim të rrezikshëm” dhe shtoi se, sipas tij, pas ngjarjes qëndron Irani ose një prej aleatëve të tij në rajon.
Ai e cilësoi incidentin si shkelje të rëndë të ligjeve dhe normave ndërkombëtare, duke theksuar rrezikun për jetën e civilëve.
