Prokuroria e Romës ka kërkuar dënim me burgim të përjetshëm për Mark Antony Samson, i akuzuar për vrasjen e ish-të dashurës së tij, Ilaria Sulës, në mars të vitit të kaluar.
Sipas akuzës, i riu e vrau me thikë vajzën dhe më pas hodhi trupin e saj, të futur në një valixhe, në një humnerë.
Samson, i cili ka pranuar krimin, akuzohet për vrasje me paramendim dhe fshehje të kufomës. Gjatë seancës gjyqësore, prokurorët deklaruan se krimi “ishte planifikuar dhe u ekzekutua me gjakftohtësi”.
Procesi po zhvillohet në sallën bunker të burgut Rebibbia në Romë. Sipas hetimeve, Samson e ka goditur Ilarian tre herë me thikë në qafë në apartamentin e tij në Romë. Pas vrasjes, ai dyshohet se e fshehu trupin në një valixhe dhe e hodhi në një humnerë në Capranica Prenestina.
Prokuroria e cilësoi dosjen hetimore si “të rëndë dhe me prova të forta”, ndërsa Samson akuzohet për vrasje të rëndë me paramendim, motive të ulëta dhe fshehje të trupit, shkruajnë mediat.
Gjatë paraqitjes së ngjarjes në gjykatë, prokurori shtesë Giuseppe Cascini deklaroi se “Samson e kishte thirrur Ilarian në një pritë në banesën e tij. Ajo fillimisht u godit me grushte dhe më pas u ther me thikë”.
Sipas prokurorisë, i riu nuk tregoi asnjë mëshirë ndaj viktimës, madje pas krimit kishte dalë për të ngrënë. Prokurori e përshkroi Samson si “manipulues, hipokrit dhe të mësuar me gënjeshtra”, duke shtuar se ai kontrollonte jetën e Ilarias gjatë marrëdhënies së tyre.
Në sallën e gjyqit ishin të pranishëm edhe prindërit e viktimës, Flamur dhe Gezime Sula. Ata deklaruan se mbështesin kërkesën për burgim të përjetshëm.
“Nesër do të ishte ditëlindja e Ilarias. Burgimin e vërtetë të përjetshëm e kemi ne, sepse ai ende jeton, merr frymë, ha dhe pi, ndërsa vajza jonë i mbylli sytë përgjithmonë”, thanë ata mes dhimbjes./TCh/
The post E vrau me thikë dhe trupin ia hodhi nga një shkëmb, prokuroria kërkon burgim të përjetshëm për ish të dashurin e studentes shqiptare në Romë appeared first on Gazeta Express.
