Demokracia në Veprim ka reaguar ndaj vendimit të Qeverisë në detyrë për ndarjen e pagesave të njëhershme për kategori të ndryshme të qytetarëve, duke e cilësuar atë si shkelje ligjore dhe keqpërdorim të resurseve publike në prag të zgjedhjeve.
Sipas DnV-së, shpërndarja e pakove financiare vetëm pak kohë para procesit zgjedhor ndikon drejtpërdrejt në ambientin zgjedhor dhe cenon barazinë e garës ndërmjet subjekteve politike, duke krijuar avantazh të padrejtë për partinë në pushtet.
Në reagim thuhet se legjislacioni zgjedhor ndalon qartë përdorimin e resurseve publike për qëllime që ndikojnë ose mund të ndikojnë në vullnetin e votuesve. Kjo, sipas tyre, përfshin përdorimin e buxhetit të shtetit, automjeteve zyrtare, administratës publike dhe infrastrukturës shtetërore gjatë fushatës zgjedhore.
DnV rikujton se Kuvendi i Kosovës nuk kishte miratuar iniciativën për plotësim-ndryshimin e Ligjit për Buxhetin, ku ishin paraparë mjetet për një pako të tillë financiare. Për këtë arsye, organizata vlerëson se vendimi bie ndesh edhe me dispozitat e Ligjit për Qeverinë, i cili kufizon kompetencat e një qeverie në detyrë në marrjen e vendimeve me implikime financiare që nuk burojnë nga planifikimi i rregullt buxhetor.
Sipas DnV-së, situata bëhet edhe më problematike për shkak se ndihma financiare po shpërndahet në mënyrë të përgjithshme dhe pa ndonjë emergjencë të re që do të arsyetonte masa të tilla urgjente.
“Mbështetja për qytetarët duhet të ndërtohet përmes politikave të qëndrueshme, të planifikuara dhe të trajtuara përmes procedurave të rregullta institucionale, e jo përmes vendimeve të improvizuara në prag të zgjedhjeve”, thuhet në reagim.
Në fund, DnV u ka bërë thirrje institucioneve që të përmbahen nga përdorimi i resurseve publike në funksion të fushatës dhe të respektojnë standardet ligjore dhe demokratike që garantojnë zgjedhje të lira dhe të ndershme. Organizata ka kërkuar gjithashtu që raste të tilla të trajtohen nga mekanizmat përgjegjës për mbrojtjen e integritetit zgjedhor dhe administrimin e ligjshëm të parasë publike./teve1.info/
