Princesha e Wales-it, Kate Middleton, është pritur me entuziazëm të madh nga qytetarët gjatë vizitës së saj në Itali, e para jashtë vendit pas trajtimit ndaj kancerit.
Kate u shfaq në sheshin qendror të qytetit Reggio Emilia, ku dhjetëra qytetarë ishin mbledhur për ta përshëndetur me duartrokitje, brohoritje dhe pankarta me mbishkrimin “Ciao Kate”.
Gjatë takimit me qytetarët, Princesha e Wales-it u ndal për të biseduar me njerëzit, realizoi selfie dhe përshëndeti shumë prej tyre, ndërsa të pranishmit mbanin lule dhe telefona celularë për të fiksuar momentin.
Kjo shënon daljen e saj të parë në një aktivitet zyrtar ndërkombëtar pas më shumë se tre vitesh. Vizita e fundit jashtë vendit e Kate Middleton ishte në Boston, së bashku me Princin William, në dhjetor të vitit 2022.
Prania e saj në Itali ka tërhequr vëmendje të madhe mediatike. Në zonë ndodheshin dhjetëra fotografë, ekipe televizive dhe forca të shumta policore, ndërsa shumë banorë ndiqnin vizitën edhe nga ballkonet dhe dritaret e ndërtesave pranë sheshit.
E buzëqeshur dhe në humor të mirë, Kejt u shfaq e veshur me një kostum blu të stilistes Edeline Lee. Sipas “Daily Mail”, ajo komunikoi edhe në italisht me disa fëmijë që ndodheshin në shesh.
“Flas pak italisht. Si quhesh? Unë jam Katerina”, mësohet të ketë thënë Princesha.
Ndërkohë, gazetari Paolo Rosato nga gazeta lokale “Il Resto del Carlino” u shpreh se Kate Middleton është shumë e pëlqyer në Itali, ndërsa shumë italianë e krahasojnë me Princeshën Diana.
Vizita e saj u fokusua edhe te ndërgjegjësimi për edukimin dhe zhvillimin e fëmijëve në vitet e para të jetës, një kauzë për të cilën Princesha e Wales-it është angazhuar prej vitesh. /Panorama
The post “Ciao Kate!”- Pritje madhështore për Princeshën e Wales-it në Itali, Kate Middleton zhvillon vizitën e parë jashtë vendit pas trajtimit të kancerit appeared first on Gazeta Express.
