Kombëtarja e Kroacisë në futboll po kalon një nga periudhat më të vështira në historinë e saj. Viti 2026 ka rezultuar katastrofal për skuadrën e Slaven Bilicit, e cila tashmë ka thyer tri rekorde negative dhe rrezikon të regjistrojë edhe një tjetër në përballjen e radhës ndaj Anglisë në Wembley.

Kroacia do të përballet me Anglinë të enjten, në orën 20:45, në kuadër të xhiros së pestë të Ligës së Kombeve. Skuadra kroate udhëton drejt Londrës pas tri humbjeve radhazi, ndërsa të dhënat e publikuara nga kompania e statistikave Opta tregojnë përmasat e krizës që po kalon kjo përfaqësuese.

Gjatë vitit 2026, Kroacia ka regjistruar shtatë humbje, më shumë se në çdo vit tjetër kalendarik në historinë e saj. Gjithashtu, ka pësuar 28 gola, shifër rekord që nga pavarësia e vendit. Edhe bilanci ofensiv është shqetësues: vetëm 15 gola të shënuar, duke e çuar diferencën e golave në -13, më të dobëtën që ka pasur ndonjëherë në një vit kalendarik.

Kontrasti me vitin paraprak është i madh. Në vitin 2025, Kroacia kishte shënuar 28 gola dhe kishte pësuar vetëm gjashtë, me një diferencë prej +22. Brenda vetëm një viti, bilanci i golave ka pësuar një ndryshim prej 35 golash.

Rrezikon katër humbje radhazi për herë të parë në histori

Rekordi i radhës negativ mund të vijë në Wembley. Nëse mposhtet nga Anglia, Kroacia do të regjistrojë për herë të parë në historinë e saj katër humbje radhazi.

Në tri ndeshjet e fundit, kroatët janë mposhtur nga Spanja me rezultat 4-1, nga Anglia 7-0 dhe sërish nga Spanja 2-1. Në këto tri përballje, ata kanë pësuar gjithsej 13 gola, duke dëshmuar vështirësitë e mëdha në repartin defensiv.

Situata është veçanërisht interesante edhe për shkak të rikthimit të Slaven Bilicit në stolin e përfaqësueses. Trajneri kroat është rikthyer në krye të ekipit në shtator të këtij viti dhe në katër ndeshjet e para të mandatit të dytë ka regjistruar një fitore dhe tri humbje.

Në mandatin e tij të parë, Bilic kishte drejtuar Kroacinë në 34 ndeshje, duke arritur 24 fitore, shtatë barazime dhe vetëm tri humbje. Kjo do të thotë se në vetëm katër ndeshjet e para pas rikthimit, ai ka pësuar po aq disfata sa në 34 takimet e para të mandatit të tij të parë.

Anglia favorite e madhe ndaj Kroacisë

Sipas parashikimeve të superkompjuterit të Optas, Anglia është favorite e qartë për këtë përballje. Përfaqësueses angleze i jepen 67.2 për qind gjasa për fitore, ndërsa mundësitë e Kroacisë vlerësohen në 14.8 për qind. Barazimi ka probabilitet prej 18 për qind.

Në përballjen e fundit mes këtyre dy përfaqësueseve, të zhvilluar më 3 tetor në Rijekë, Anglia kishte triumfuar me rezultat të thellë 7-0. Ajo ishte humbja më e rëndë në historinë e futbollit kroat. Për më tepër, anglezët kanë fituar katër përballjet e fundit ndaj kroatëve.

Megjithatë, Wembley është një stadium me kujtime të veçanta për Bilićin. Në nëntor të vitit 2007, Kroacia kishte fituar 3-2 ndaj Anglisë pikërisht në këtë stadium, duke e lënë jashtë Kampionatit Evropian të vitit 2008. /Telegrafi/