Deputeti i Aleancës për Ardhmërinë e Kosovës (AAK), Besnik Tahiri, ka akuzuar Qeverinë në detyrë për vazhdimin e emërimeve në pozita publike, duke thënë se këto veprime përbëjnë tentativë për “kapje të shtetit”.
Tahiri ka thënë se janë marrë 18 vendime dhe janë themeluar 18 komisione për emërime në agjenci ekzekutive, agjenci qeveritare dhe pozita të larta në administratën shtetërore.
Sipas tij, në disa prej këtyre rasteve janë përfshirë edhe të njëjtët persona.
“Qeveria në detyrë nuk mund të sillet sikur ka mandat të pakufizuar. Ligji për Qeverinë është i qartë. Neni 31 përcakton kufizimet e Qeverisë në dorëheqje, përfshirë kufizimin për procedurat e reja të emërimit në pozita publike”, ka deklaruar Tahiri.
Ai ka kritikuar Qeverinë duke thënë se po tenton ta shndërrojë administratën shtetërore në instrument të një partie politike.
“Si Grup Parlamentar i Aleancës, e kemi thënë qartë: nuk do të lejojmë parti-shtet! Administrata e Republikës së Kosovës nuk është pronë e asnjë partie”, ka thënë ai.
Tahiri ka kërkuar anulimin e menjëhershëm të këtyre vendimeve, ndërsa ka paralajmëruar se çështjen do ta adresojnë edhe te organet përgjegjëse të drejtësisë, përfshirë kallëzimet penale, aty ku, sipas tij, ekziston bazë ligjore.
Ai ka thënë se AAK-ja do të vazhdojë ta ngrejë edhe çështjen e funksioneve të dyfishta dhe papajtueshmërisë së mandateve të deputetëve me funksione të tjera publike.
“Administrata e Republikës së Kosovës nuk është pronë e asnjë partie dhe institucionet e shtetit nuk mund të kapen në ditët kur kjo qeveri është në detyrë dhe pa legjitimitet të ri politik”, ka përfunduar Tahiri.
The post Besnik Tahiri: Administrata e shtetit duhet të ruhet nga partizimi appeared first on Gazeta Express.
