Personat me çrregullim të vëmendjes dhe hiperaktivitetit, ADHD, mund të kenë më shpesh probleme të sistemit tretës. Këtë e sugjeron një analizë e re që ka përfshirë të dhëna nga më shumë se 1.9 milionë njerëz.
Studimi, i realizuar nga studiues të Universitetit të Warwick dhe i bazuar në të dhëna nga 23 studime ndërkombëtare, gjeti se ADHD ishte e lidhur me një rritje prej afro 50 për qind të simptomave gastrointestinale krahasuar me personat pa ADHD, shkruan University of Warwick, transmeton Gazeta Shneta.Lidhjet më të forta u panë për kapsllëkun dhe sindromën e zorrës së irrituar. Personat me ADHD kishin më shumë se dyfishin e gjasave për kapsllëk dhe rreth 58 për qind rrezik më të lartë për sindromën e zorrës së irrituar.
Studiuesit vunë re gjithashtu një lidhje me enkoprezën, një gjendje ku personi nuk arrin të kontrollojë jashtëqitjen. Në analizën e përgjithshme, kjo gjendje ishte më shumë se katër herë më e zakonshme te njerëzit me ADHD.
Shkencëtarët theksojnë se studimi tregon një lidhje dhe jo domosdoshmërisht një shkak të drejtpërdrejtë. Mekanizmat e mundshëm mund të lidhen me boshtin tru zorrë, mikrobiomën, mënyrën e ushqyerjes ose efektet anësore të disa barnave për ADHD. Gjetjet sugjerojnë se problemet gastrointestinale mund të meritojnë më shumë vëmendje gjatë kujdesit ndaj personave me ADHD.
