Profesori universitar, Dashamir Bërxulli ka vlerësuar se akuzat e kryeministrit në detyrë, Albin Kurti, për ekzistencën e një “blloku opozitar” nuk qëndrojnë, duke theksuar se në opozitën aktuale në Kosovë nuk ekziston një bashkim i ngjashëm me atë të viteve të kaluara.
Në emisionin “Këndi i Debatit” në Tëvë1, Bërxulli ka përmendur bashkëpunimin e kaluar mes partive opozitare, të njohur si VLAN (Vetëvendosje, LDK, AAK dhe Nisma), duke theksuar se një strukturë e tillë nuk ekziston aktualisht.
Ai ka vlerësuar se një koordinim më i madh mes partive opozitare, si ai i VLAN-it, do të ishte i dobishëm për artikulimin më të qartë të mesazheve politike dhe për ndikimin në qeverisjen e ardhshme, por ka shtuar se, sipas tij, opozita “i frikësohet këtyre elementeve”.
“Kur Kurti bënte blloqe opozitare, ato konsideroheshin në rregull, ndërsa tani thuhet se ekziston një bllok opozitar, por realisht nuk ka një të tillë si VLAN-i i vitit 2014. Kjo ideja se ‘të gjithë janë kundër Kurtit dhe ai është fituesi’ nga pikëpamja e saktësisë nuk qëndron. Nuk ka VLAN në opozitën e sotme të Kosovës dhe është për të ardhur keq që nuk ekziston një i tillë. Mendoj se do të mund të bëheshin disa koordinime duke njohur profilin e partive politike, dhe në këto zgjedhje do të mund të dilnin mesazhe më të qarta për qeverisjen e ardhshme, por duket se blloku opozitar i frikësohet këtyre elementeve”, ka thënë Bërxulli.
Bërxulli gjithashtu ka kritikuar diskursin politik të Kurtit, duke thënë se ai vazhdimisht e vendos fajin te opozita dhe shmang përgjegjësinë politike.
Sipas tij, kjo narrativë është ndërtuar gradualisht gjatë muajit prill dhe ka ndikuar në komunikimin politik në prag të zgjedhjeve.
“Vija melodike kryesore e Kurtit është fajësimi i opozitës. Opozita e bashkuar po i çon gjërat në zgjedhje, ndërsa mungon marrja e përgjegjësisë për gjithë procesin. Prilli ka qenë muaji në të cilin është shtruar kjo rrugë që Vetëvendosje t’ua hedhë fajin të tjerëve dhe të bindë njerëzit me veprimet e veta, të cilat kanë qenë lëvizje politike për zgjedhjen e presidentit, me qëllim që të fitohet kohë dhe të konsolidohet në mendjet e njerëzve një mesazh politik që do të ishte kryefjala e zgjedhjeve, siç po e shohim tani. Kurti në komunikimin politik është shumë i aftë; ai di mirë të sintetizojë atë që ka në mendje për të nxitur mesazhe tek votuesit”, ka përfunduar Bërxulli./teve1.info/
