Aleanca e Atlantikut të Veriut (NATO) po shqyrton mundësinë e një misioni ushtarak në Ngushticën e Hormuzit, me qëllim mbrojtjen e anijeve tregtare, në një kohë kur bllokimi i zgjatur i kësaj rruge strategjike po rrit tensionet globale dhe po ndikon në çmimet e energjisë.
Ideja e një ndërhyrjeje të NATO-s po fiton mbështetje nga disa vende anëtare, por ende nuk ka konsensus të plotë brenda aleancës. Një diplomat i një vendi anëtar të NATO-s konfirmoi se disa shtete janë në favor të një misioni për të garantuar lundrimin e sigurt, ndërsa të tjera mbeten të kujdesshme për shkak të rrezikut të përfshirjes më të thellë në konfliktin SHBA–Izrael me Iranin, shkruan Bloomberg.
Komandanti Suprem i Forcave Aleate të NATO-s në Evropë, Alexus Grynkewich, deklaroi se çdo vendim duhet të nisë fillimisht me drejtimin politik, përpara planifikimit ushtarak, duke shtuar: “A po mendoj për këtë? Absolutisht jo.”
Një përfshirje e mundshme e NATO-s në rajon do të përbënte një ndryshim të rëndësishëm të qëndrimit të aleancës ndaj krizës. Deri më tani, aleatët kanë theksuar se çdo ndërhyrje në Ngushticën e Hormuzit duhet të shqyrtohet vetëm pas përfundimit të armiqësive dhe në kuadër të një koalicioni më të gjerë ndërkombëtar.
Ngushtica e Hormuzit mbetet një pikë strategjike kyçe, përmes së cilës kalon rreth një e pesta e furnizimeve botërore me naftë dhe gaz të lëngshëm. Bllokimi i saj ka shkaktuar rritje të çmimeve të energjisë dhe shqetësime për ekonominë globale.
Sipas raportit, Irani ka vazhduar të kufizojë lundrimin në këtë zonë që pas përshkallëzimit të tensioneve dhe sulmeve ushtarake në rajon, duke e kthyer ngushticën në një nga pikat më të nxehta të përplasjes gjeopolitike mes SHBA-së dhe aleatëve të saj evropianë.
Ndërkohë, vendet e NATO-s mbeten të ndara për mënyrën e veprimit. Disa shtete, përfshirë Spanjën, kanë shprehur kundërshtim të hapur ndaj përfshirjes në operacione ushtarake, ndërsa të tjera kanë ofruar mbështetje logjistike përmes bazave të tyre.
