Forcat e armatosura të Kinës filluan stërvitjen sekrete të rreth 200 ushtarëve rusë që ishin të përfshirë në operacione në Ukrainë në fund të vitit 2025, sipas informacioneve nga tre agjenci evropiane të inteligjencës dhe dokumenteve të shqyrtuara nga ‘Reuters’.
Pavarësisht ushtrimeve të shumta të përbashkëta ushtarake midis Kinës dhe Rusisë që nga pushtimi i Ukrainës nga Moska në vitin 2022, Pekini është deklaruar vazhdimisht neutral dhe është paraqitur si ndërmjetës paqeje.
Megjithatë, stërvitja sekrete zbulon përfshirjen e drejtpërdrejtë të Kinës në luftën në Evropën Lindore, kryesisht përmes trajnimit të ushtarëve në përdorimin e dronëve.
“Lidhur me krizën në Ukrainë, Kina ka mbajtur vazhdimisht një qëndrim objektiv dhe të paanshëm dhe ka punuar për të promovuar bisedimet e paqes. Ky qëndrim është i qëndrueshëm dhe i qartë dhe është pohuar nga bashkësia ndërkombëtare”, tha Ministria e Jashtme e Kinës në një deklaratë. “Palët e përfshira nuk duhet të nxisin qëllimisht konfrontim ose të zhvendosin përgjegjësinë”, theksohet aty.
Sipas marrëveshjes Rusi-Kinë, e cila thuhet se është nënshkruar më 2 korrik 2025 dhe është shqyrtuar nga Reuters, ushtarët rusë u trajnuan në objekte ushtarake në Pekin dhe në qytetin jugor të Nanjingut, ndërsa qindra ushtarë kinezë morën trajnim në Rusi.
Trajnimi u përqendrua në përdorimin e dronëve, luftës elektronike, aviacionit ushtarak dhe këmbësorisë së blinduar, ndërsa prezantimi i marrëveshjes ndalonte publikimin dhe informacionin ndaj palëve të treta.
Disa nga ushtarët rusë të trajnuar morën pjesë drejtpërdrejt në operacione në Ukrainë, në zona të tilla si Krimea dhe Zaporizhia, ndërsa hierarkia e të trajnuarve përfshinte nga nënoficerë deri te kapitenë, sipas burimeve sekrete evropiane.
Përdorimi i dronëve është provuar thelbësor në Ukrainë, me modele me rreze të gjatë veprimi që sulmojnë objektiva qindra kilometra larg dhe dronë më të vegjël, të operuar me FPV, që dominojnë ajrin, duke e bërë lëvizjen e automjeteve të blinduara ose këmbësorisë të rrezikshme.
Raportet e brendshme ruse detajojnë katër kurse kryesore trajnimi në Kinë , duke përfshirë trajnimin me mortaja 82 mm, mbrojtjen ajrore, dronë luftarakë dhe përdorimin e simulatorëve të fluturimit. Trajnimi u zhvillua në akademitë ushtarake në Shijiazhuang, Zhengzhou dhe në Universitetin e Inxhinierisë Ushtarake në Nanjing.
Në të njëjtën kohë, ushtarët kinezë të trajnuar në Rusi (këto vizita kanë ndodhur që të paktën nga viti 2024) u njohën me ndërlidhjen e forcave dhe mbështetjen e operacioneve ushtarake, gjë që forcon bashkëpunimin ushtarak midis dy vendeve dhe konfirmon strategjinë e tyre “pa kufizime” – siç e quajnë ata – që nga fillimi i luftës në Ukrainë. /Panorama
The post Raporti i “Reuters”: Kina stërviti fshehurazi 200 ushtarë rusë që luftuan në Ukrainë, trajnime edhe për goditjen me dronë appeared first on Gazeta Express.
