Qeveria e Mbretërisë së Bashkuar dhe BE-ja mbajtën samitin e tyre të parë të përbashkët që nga Brexit-i në maj 2025, ku paraqitën një partneritet të ri strategjik MB-BE të cilësuar si një “rivendosje” e marrëdhënieve.
Një samit tjetër pritet më vonë këtë verë, dhe javën e kaluar kryeministri britanik Keir Starmer theksoi se qeveria e tij “do të përcaktohet nga rindërtimi i marrëdhënies sonë me Europën”. Ja ku janë forcuar deri tani lidhjet, sipas BBC:
Studimi jashtë vendit: Mbretëria e Bashkuar do t’i rikthehet skemës së studimit Erasmus nga viti 2027, duke u mundësuar shtetasve britanikë të kalojnë një vit duke studiuar në universitete europiane si pjesë e programeve të diplomës pa paguar tarifa shtesë – dhe anasjelltas për studentët europianë.
Peshkimi: Anijeve të BE-së iu dha qasje e vazhdueshme në ujërat britanike deri në vitin 2038, me Mbretërinë e Bashkuar që vazhdon të dakordohet për kuota vjetore dhe të lëshojë licenca për të kontrolluar se kush peshkon në ujërat e saj.
Eksportet bujqësore: Në këmbim të zgjatjes së rregullave aktuale të peshkimit, Mbretëria e Bashkuar ka siguruar një marrëveshje për t’i reduktuar kontrollet mbi eksportet ushqimore drejt BE-së – që do të thotë se shumica dërrmuese e kontrolleve mbi dërgesat e kafshëve dhe bimëve drejt dhe nga BE-ja hiqen.
Mbrojtja dhe siguria: Është krijuar një pakt formal MB-BE për mbrojtjen dhe sigurinë – me zyrtarë që do të takohen çdo gjashtë muaj për të diskutuar politikën e mbrojtjes dhe atë të jashtme.
Portat elektronike të pasaportave: Pushuesit britanikë do të mund të përdorin portat elektronike në më shumë aeroporte europiane. Secili shtet i BE-së do të vendosë nëse qytetarët britanikë mund të përdorin portat elektronike në pikat e tij kufitare, por qeveria ka premtuar të punojë për të zgjeruar qasjen “sa më shpejt të jetë e mundur”.
The post BBC: Si është përpjekur Starmer t’i “rivendosë” marrëdhëniet me Euopën appeared first on Gazeta Express.
