Anëtarja e Aleancës për Ardhmërinë e Kosovës në Gjakovë, Edona Cana-Lipoveci, ka reaguar ndaj Lëvizjes Vetëvendosje, e cila dje ka zgjedhur Gjakovën për prezantimin e listës së kandidatëve për zgjedhjet e 7 qershorit.
Sipas saj, zgjedhja e Gjakovës nuk është rastësore, por ka një domethënie politike, duke theksuar se ky qytet mbetet i rëndësishëm në garën elektorale dhe në balancat politike lokale.
Ajo tha se Gjakova është zgjedhur si vend prezantimi për shkak të rëndësisë së saj politike dhe rezultateve të mëhershme zgjedhore të Aleanca për Ardhmërinë e Kosovës në këtë komunë.
Cana-Lipoveci theksoi se kandidati për kryeministër nga kjo parti vjen pikërisht nga Gjakova dhe se, pavarësisht “gjuhës së urrejtjes, sulmeve dhe përpjekjeve për ta lodhur politikisht”, kryetari aktual i komunës, Ardian Gjini, ka siguruar edhe mandatin e tretë.
“Sepse Gjakova nuk është zgjedhur rastësisht. Është zgjedhur sepse aty dhemb, sepse është qyteti ku vazhdon me humbë e kjo nuk është vetëbesim miq të dashur…Sepse kandidati më i denjë për kryeministër është pikërisht nga Gjakova”, shkruan ajo.
Ajo shtoi se rezultatet në Gjakovë, sipas saj, tregojnë se qytetarët nuk e kanë harruar periudhën e mungesës së investimeve dhe bllokimeve institucionale në komunë, duke e cilësuar Aleancën si forcën më të votuar në qytet.
Në reagimin e saj, ajo kritikoi gjithashtu mënyrën e prezantimit të listës nga VV, duke thënë se në disa raste është lënë në hije identiteti i subjektit politik, duke e quajtur këtë një paraqitje të paqartë politike dhe të pazakontë për një subjekt qeverisës.
“Prandaj erdhën në Gjakovë, për ta fituar qytetin jo se jo, por për ta bindur veten se nuk po tremben…E ironia? Në fund, edhe prezantimi ishte interesant: shumë “lista fituese”, pak subjekt, diku-diku harruan edhe ta përmendin…. E kur emri i partisë fillon të mungojë, po doket ma shumë si sponzor teknik, si me thanë jam djali i “51 porqinshit””.
The post Anëtarja e AAK-së kritikon VV: Prezantimi i listës në Gjakovë synon ndikim politik në prag të zgjedhjeve appeared first on Gazeta Express.
