Kufiri shtetëror i ndan administrativisht nga Republika e Kosovës. Por shqiptarët që jetojnë në Serbi, sytë dhe veshët i kanë gjithmonë nga Prishtina.
Lajmi se bashkëkombësi i tyre, Ragmi Mustafi, është përfshirë në listën për deputet të Kuvendit të Kosovës, ka ndezur shpresat në Luginë.
Për herë të parë, ata shohin një mundësi reale që zëri i tyre të dëgjohet drejtpërdrejt në parlament.
“Ky është një lajm jashtëzakonisht i mirë për ne. Kemi pasur nevojë gjithmonë për dikë atje”, thotë Enver Mehmeti-qytetar nga Presheva.
Të njëjtin mendim me Mehmetin e ndajnë edhe qytetarët e tjerë të anketuar.
Sipas tyre, problemet dhe kërkesat e Preshevës, Bujanocit dhe Medvegjës duhet të kenë përfaqësim legjitim edhe brenda institucioneve të Kosovës.
Këtë zhvillim politik e ka mirëpritur zyrtarisht edhe e para e Komunës së Preshevës, Ardita Sinani.
Ajo vlerëson se ky hap do të jetë një urë lidhëse e fuqishme, jo vetëm për banorët rezidentë, por edhe për të gjithë shqiptarët e kësaj ane që tashmë jetojnë dhe veprojnë brenda Kosovës.
Që nga shpallja e pavarësisë e deri më sot, Kuvendi i Kosovës asnjëherë nuk ka pasur në përbërjen e tij një përfaqësues direkt nga Lugina e Preshevës. Këtë herë, tabuja synohet të thyhet nga Ragmi Mustafi, i cili garon në listën e Lëvizjes Vetëvendosje.
The post Kandidatura e Mustafit mirëpritet nga preshevarët appeared first on TËVË 1 – Lexoje të vërtetën!.
