Këshilli i Sigurisë i Izraelit pritet të mblidhet së shpejti nën drejtimin e kryeministrit Benjamin Netanyahu, mes raportimeve se SHBA dhe Izraeli po përgatiten për një rifillim të mundshëm të luftës me Iranin.
Në të njëjtën kohë, Netanyahu zhvilloi një bisedë telefonike me presidentin amerikan Donald Trump, gjatë së cilës u diskutuan rezultatet e vizitës së Trump në Kinë.
Zhvillimet vijnë pas një sulmi me dron ndaj një centrali bërthamor në Emiratet e Bashkuara Arabe, vend që së bashku me Izraelin ka pësuar goditje të forta nga Irani gjatë konfliktit të fundit.
“Jemi vigjilentë për gjithçka që lidhet me Iranin”, deklaroi Netanyahu gjatë mbledhjes javore të qeverisë. Ai shtoi se do të dëgjojë përshtypjet e Trump nga takimi me Kinën dhe se Izraeli është i përgatitur për çdo skenar.
Javën e kaluar, Trump zhvilloi një samit në Pekin me presidentin kinez Xi Jinping. Sipas Trump, Xi ka ofruar ndihmë për rihapjen e Ngushticës së Hormuzit, një rrugë kyçe për tregtinë globale të naftës, e cila është bllokuar nga Irani.
Trump deklaroi gjithashtu se Kina është zotuar të mos dërgojë pajisje ushtarake për të mbështetur Teheranin në luftë.
Pas kthimit nga Kina, Trump publikoi në rrjetet sociale një imazh të krijuar me inteligjencë artificiale, ku shfaqej përpara një deti të trazuar pranë anijeve ushtarake, mes tyre edhe një anije me flamur iranian. Postimi shoqërohej me mbishkrimin: “Ishte qetësia para stuhisë”. /Panorama
The post Mblidhet Këshilli i Sigurisë në Izrael, Trump dhe Netanyahu zhvillojnë bisedë telefonike! Presidenti amerikan informon mbi vizitën në Pekin dhe takimin me Xi appeared first on Gazeta Express.
