Një shqiptar i dënuar për vrasje të trefishtë, të cilit iu dha azil dhe shtetësi në Mbretërinë e Bashkuar duke qenë në arrati, është arrestuar në SHBA.
Sokol Hoxha, 50 vjeç, u arratis për në Britani pasi vrau gruan e tij 19-vjeçare në vitin 1997 në Belgjikë si dhe dy vëllezër në Shqipëri në të njëjtin vit.
Ai hyri në Britani duke përdorur një identitet të rremë, duke pretenduar se ishte refugjat kosovar, gjë që i lejoi të kërkonte azil dhe në fund shtetësi britanike.
Në 2020-ën autoritetet policore nisën një hetim që u shtri në dy kontinente dhe që rezultoi me arrestimin e Hoxhës në Kettering të Ohajos në SHBA.
Një zëdhënës i Shërbimit të Marshallëve të SHBA-së tha: “Arrestimi i Hoxhës shënoi kulmin e një hetimi 6-vjeçar për të arratisurin, të udhëhequr nga Interpol Washington në koordinim me partnerë të shumtë vendas dhe ndërkombëtarë të zbatimit të ligjit.
Gjatë hetimit, autoritetet zbuluan se Hoxha mori një identitet të rremë pasi u largua nga Belgjika dhe më pas mori shtetësinë në një vend tjetër evropian. Hoxha më vonë dyshohet se hyri në SHBA dhe mori statusin e qëndrimit të përhershëm të ligjshëm, ndërsa vazhdoi të fshihte identitetin e tij të vërtetë.”
Sipas gazetës “The Telegraph”, Mbretëria e Bashkuar i dha azil Hoxhës që përdorte identitetin e tij të rremë. Ai kishte udhëtuar në SHBA në vitin 2012, duke përdorur pseudonimin për ta mbajtur sekret identitetin e tij të vërtetë për 14 vjet të tjera.
Hoxha u dënua në mungesë me 25 vjet burg për vrasjen e dyfishtë të dy vëllezërve në Patos të Shqipërisë. Ai dyshohet se vrau edhe gruan e tij 19-vjeçare pasi ajo refuzoi kërkesat e tij që të bëhej prostitutë.
“The Telegraph” shkruan se ai nuk është i vetmi shqiptar që ka marrë një pasaportë britanike duke përdorur një emër të rremë. Avni Metra, i cili vrau dy vëllezër para se të vinte në Mbretërinë e Bashkuar, iu dha azil dhe më pas një pasaportë duke përdorur një emër të rremë pasi u shtir si refugjat lufte nga Kosova. Ai u dënua me 25 vjet burg në mungesë dhe përfundimisht u ekstradua në Shqipëri.
Arsim Murati, 46 vjeç, apeloi me sukses një përpjekje të Sekretarit të Brendshëm për t’i hequr shtetësinë, pasi ai deklaroi në mënyrë të rreme se ishte kosovar për të qëndruar në Mbretërinë e Bashkuar dhe nuk tregoi se kishte vuajtur një dënim të gjatë me burg për grabitje të armatosur në Shqipëri.
Afrim Sinani, i cili u dënua me 20 vjet burg për vrasje në Shqipëri, erdhi në Mbretërinë e Bashkuar në vitin 1998 duke kërkuar azil si refugjat nga Kosova nën emrin e rremë Afrim Pulaj. Pas një beteje të gjatë ligjore, ai u ekstradua në Shqipëri në vitin 2010.
Ilir Kumbaro, një ish-drejtor dege i shërbimit sekret shqiptar u dënua në mungesë me 15 vjet burg për rrëmbimin dhe torturimin e një biznesmeni. Edhe ai erdhi në Mbretërinë e Bashkuar duke përdorur një emër të rremë. Ai siguroi një pasaportë, por u zhduk ndërsa ishte në lirim me kusht për ekstradim dhe nuk është gjetur kurrë. ©LAPSI.al
The post Vrau gruan në Belgjikë dhe 2 vëllezër në Shqipëri, shqiptari arrestohet pas 30 vitesh appeared first on Gazeta Express.
