Friedrich Merz, kancelari gjerman, tashmë i përfshirë në një përplasje me Donald Trump lidhur me luftën në Iran, ka deklaruar se nuk do t’i këshillonte fëmijët e tij të studionin ose të punonin në SHBA në klimën aktuale.
Duke folur në një konferencë të të rinjve katolikë në Würzburg, lideri konservator, i cili nga shumë shihet si një mbështetës i fortë i marrëdhënieve transatlantike, tha se nuk e sheh më SHBA-në si “tokën e mundësive”.
“Jam një admirues i madh i Amerikës. Për momentin admirimi im nuk po rritet,” tha ai gjatë një diskutimi në podium, duke përmendur “klimën sociale” që po ndryshon me shpejtësi në një vend thellësisht të polarizuar, shkruan The Guardian, transmeton Gazeta Exress.
“Nuk do t’i këshilloja sot fëmijët e mi të shkonin në SHBA, të arsimoheshin atje apo të punonin atje, thjesht sepse papritur është zhvilluar një klimë e caktuar sociale”.
70-vjeçari, baba i tre fëmijëve, vazhdoi: “Sot, edhe njerëzit më të arsimuar në Amerikë po e kanë shumë të vështirë të gjejnë punë”.
Duke folur për vendin e tij, Merz u bëri thirrje gjermanëve të mos bien në pesimizëm për gjendjen e botës dhe i inkurajoi të jenë më optimistë për potencialin e Gjermanisë.
“Besoj fuqimisht se ka pak vende në botë që ofrojnë mundësi kaq të mëdha, sidomos për të rinjtë, sa Gjermania”, tha ai.
Komentet për SHBA-në shkaktuan menjëherë një reagim të furishëm nga kampi i Trumpit. Richard Grenell, këshilltar afatgjatë i politikës së jashtme për republikanët dhe ish-ambasador në Gjermani gjatë mandatit të parë të Trumpit, shkroi në X: “Friedrich Merz është bërë presidenti europian i shoqërisë TDS,” duke iu referuar të ashtuquajturit “Trump derangement syndrome” (Sindroma e fiksimit obsesiv ndaj Trumpit).
Ai tha se kur Merz u takua me Trumpin në Shtëpinë e Bardhë, më së fundi në mars, ai ishte “plotësisht i butë dhe komplimentues”, dhe se komentet e së premtes bien ndesh me atë qasje pajtuese. “Gjermanët kanë një lider që nuk ka strategji – dhe kontrollohet plotësisht nga media woke gjermane,” tha Grenell.
Liderja e ekstremit të djathtë gjerman Alice Weidel, partia e së cilës Alternative für Deutschland mbështetet nga anëtarë të lëvizjes Maga të Trumpit, gjithashtu komentoi deklaratat e kancelarit.
“Merz këshillon kundër udhëtimit në SHBA për shkak të ‘klimës politike’. Ironikisht, është një kancelar që po e çon qëllimisht vendin e tij drejt rrënimit social dhe ekonomik ai që tani po paralajmëron të tjerët,” shkroi ajo në rrjetet sociale. “Kjo nuk është në interesin e Gjermanisë”.
Mosmarrëveshjet për tregtinë dhe ndihmën ushtarake për Ukrainën kanë nxitur tensionet mes SHBA-së dhe aleatëve të saj europianë dhe kanë vënë në provë aleancën e NATO-s.
Merz po përpiqet të ringjallë ekonominë e dobët gjermane dhe ka thënë se ndikimi i veprimeve ushtarake SHBA-Izrael në Iran dhe mbyllja pasuese e ngushticës së Hormuzit kanë dëmtuar rëndë interesat europiane.
Në fund të muajit të kaluar ai habiti dëgjuesit në Gjermani dhe SHBA me komentet e tij të drejtpërdrejta, duke deklaruar se amerikanët po “poshtërohen” nga udhëheqja iraniane në konfliktin aktual, gjë që zemëroi Trumpin.
The post Merz thotë se “nuk do t’i këshilloja fëmijët e mi të shkonin në SHBA”, i reagon Grenell appeared first on Gazeta Express.
