Kryeministrja letoneze Evika Siliņa ka dhënë dorëheqje pas një krize politike lidhur me dronët ukrainas të destinuar për në Rusi që hynë gabimisht në territorin e Letonisë.
Ajo kishte shkarkuar javën e kaluar ministrin e saj të Mbrojtjes, Andris Sprūds, pasi dy dronë u rrëzuan në lindje të Letonisë, duke kritikuar reagimin e tij dhe duke emëruar një zëvendësues.
Në shenjë proteste, partia e Sprūds, Progresistët, tërhoqi mbështetjen për koalicionin qeverisës të Siliņës, duke shkaktuar rrëzimin e qeverisë vetëm disa muaj para zgjedhjeve të përgjithshme të planifikuara për në tetor.
“Duke parë një kandidat të fortë për postin e ministrit të mbrojtjes… demagogët politikë kanë zgjedhur krizën”, tha Siliņa të enjten. “Po jap dorëheqjen, por nuk po heq dorë”.
Pasojat politike u shkaktuan nga hyrja e tre dronëve në hapësirën ajrore të Letonisë më 7 maj — incidenti i dytë i tillë që nga fillimi i vitit 2026.
Si Letonia ashtu edhe Ukraina pranuan se dronët mund të kenë qenë UAV ukrainas të synuar për të goditur Rusinë, por sinjalet e tyre ishin bllokuar elektronikisht, duke bërë që ata të devijonin drejt Letonisë.
Një dron u rrëzua në tokë, ndërsa një tjetër goditi një depo të zbrazët të produkteve të naftës pranë qytetit Rēzekne. Droni i tretë hyri dhe doli nga hapësira ajrore e Letonisë.
Nuk pati viktima apo të lënduar — por banorët lokalë u thanë mediave se reagimi zyrtar ndaj incidentit kishte qenë i vonuar dhe i pamjaftueshëm. Ata thanë se sistemi i alarmit përmes telefonave celularë nuk ishte aktivizuar për një orë pasi një nga dronët u rrëzua pranë Rēzeknes.
The post Kryeministrja e Letonisë jep dorëheqje pas debatit për dronët ukrainas që hynë gabimisht në territorin letonez appeared first on Gazeta Express.
