Të paktën katër persona kanë humbur jetën dhe dhjetëra të tjerë, përfshirë fëmijë, janë plagosur pasi Rusia kreu një valë masive sulmesh me dronë dhe raketa ndaj Ukrainës gjatë natës, kanë bërë të ditur zyrtarët.
Tre nga viktimat u nxorën nga rrënojat e një ndërtese banimi pjesërisht të shkatërruar në Kiev, tha policia, ndërsa operacionet e kërkim-shpëtimit po vazhdojnë pas bombardimeve ndaj kryeqytetit.
Të paktën 44 persona janë plagosur, përfshirë dy fëmijë, tha kryetari i Kievit teksa shtoi se 21 prej tyre po trajtohen në spital, mes tyre edhe një fëmijë.
Kjo shënon ditën e tretë radhazi që Ukraina raporton viktima, ndërsa Moska ka shtuar sulmet pas përfundimit të armëpushimit treditor të hënën, shkruan BBC, transmeton Dukagjini.
Sipas presidentit ukrainas, Volodymyr Zelensky, gjatë sulmit të natës u lëshuan më shumë se 670 dronë dhe 56 raketa në mbarë vendin. Ky konsiderohet një nga sulmet më të mëdha që Rusia ka kryer që nga fillimi i pushtimit të plotë në vitin 2022.
Në kryeqytet, operacionet e kërkim-shpëtimit nisën herët të enjten për të gjetur persona nën rrënojat e një ndërtese nëntëkatëshe të goditur gjatë natës.
Policia tha se dy burra, të moshës 21 dhe 30 vjeç, si dhe një grua ende e paidentifikuar, u gjetën të vdekur në hyrjen e shkatërruar të ndërtesës.
Viktima e katërt ishte një burrë që vdiq në spital, shtoi policia e qytetit. Ai ndodhej në një pikë karburanti që u godit nga sulmi.
Kryetari i Kievit, Vitaliy Klychko, i cili vizitoi ndërtesën e dëmtuar, tha se 18 apartamente janë shkatërruar teksa shtoi gjithashtu se sulmi ka ndërprerë furnizimin me ujë në qytet.
Më shumë se 1,500 shpëtimtarë dhe policë po punojnë pas sulmeve të natës, rreth 600 prej tyre në Kiev, tha ministri i Punëve të Brendshme, Ihor Klymenko.
Dhjetëra persona janë nxjerrë nga ndërtesa e dëmtuar dhe më shumë se 10 të tjerë besohet se janë ende të zhdukur.
“Sulmi në shkallë të gjerë u bë me dronë rusë të fluturonin mbi pjesë të mëdha të Ukrainës, ndërsa rajonet Kremenchuk, Bila Tserkva, Kharkiv, Sumy dhe Odesa gjithashtu u vunë nën zjarr”, tha kryeministrja Svyrydenko.
“Ukraina ka nevojë për ndihmë në forcimin e mbrojtjes ajrore. Kjo është mënyra e vetme për të shpëtuar njerëzit dhe qytetet tona”, tha ajo.
Sulmet e fundit ndodhën menjëherë pas përfundimit të armëpushimit treditor të ndërmjetësuar nga SHBA-ja, i cili përfundoi të hënën vonë.
Si Rusia ashtu edhe Ukraina raportuan shkelje të shumta gjatë armëpushimit, kryesisht përgjatë vijës së frontit, por pa sulme të mëdha ajrore.
Rusia rifilloi sulmet të martën, duke vrarë nëntë persona.
Gjashtë persona të tjerë u vranë në një tjetër sulm të madh të mërkurën, gjatë të cilit Ukraina raportoi se Rusia kishte lëshuar 892 dronë.
Të enjten në mëngjes, Zelensky tha se më shumë se 1,560 dronë rusë kanë shënjestruar qytetet ukrainase që nga nata e së martës.
Ai e përshkroi sulmin masiv rus si “sigurisht jo veprime të atyre që besojnë se luftës po i vjen fundi” dhe u bëri thirrje aleatëve të Ukrainës të mos heshtin.
