Një gabim i vogël drejtshkrimor ka marrë vëmendje të madhe në dokumentin e firmosur në Shtëpinë e Bardhë nga presidenti amerikan Donald Trump dhe disa prej emrave më të fuqishëm të industrisë botërore të teknologjisë.
Ironikisht, gafa gjendet pikërisht në marrëveshjen që mban emrin “White House Accord on Super Intelligence” dhe që synon të përcaktojë standarde sigurie për zhvillimin e sistemeve më të avancuara të Inteligjencës Artificiale.
Në faqen ku janë vendosur firmat, poshtë nënshkrimit të Donald Trump, titulli i tij është shkruar:
“President of the Unites States”
në vend të formulimit të saktë:
“President of the United States”.
Gabimi nuk kaloi pa u vënë re dhe fotografia e dokumentit nisi të qarkullojë gjerësisht në rrjetet sociale, ku përdorues të shumtë ironizuan faktin se një marrëveshje për “Super Inteligjencën”, e firmosur nga disa prej njerëzve që drejtojnë kompanitë më të avancuara teknologjike në botë, kishte kaluar deri në publikim pa u evidentuar një gabim kaq i thjeshtë drejtshkrimor.
Dokumenti u firmos më 29 shtator nga Trump dhe drejtuesit e gjashtë kompanive kryesore të teknologjisë: Sundar Pichai i Google, Dario Amodei i Anthropic, Mark Zuckerberg i Meta, Greg Brockman i OpenAI, Elon Musk i xAI dhe Jensen Huang i Nvidia.
Marrëveshja parashikon një sistem me katër nivele kontrolli për kompanitë që zhvillojnë modelet më të avancuara, duke përfshirë kontrolle të brendshme, struktura të posaçme monitorimi, vlerësime nga auditorë të jashtëm të pavarur dhe mbikëqyrje në nivel bordi.
Trump e ka cilësuar marrëveshjen si “moralisht detyruese” dhe e ka krahasuar atë me një lloj “kushtetute” për zhvillimin e teknologjisë.
Por, të paktën në ditën e parë të saj, vëmendjen po e merr pikërisht detaji që duket se i shpëtoi “Super Inteligjencës”: një shkronjë që e shndërroi “United States” në “Unites States”.
The post Gafa në dokumentin e Trump me Musk e Zuckerberg, Shtëpia e Bardhë shkruan gabim emrin e SHBA appeared first on Gazeta Express.
