Qeveria e koalicionit të Spanjës ka miratuar masa të reja për strehimin pas protestave lidhur me krizën e banesave në vend, të cilat u nxitën nga dëbimi i një gruaje 87-vjeçare nga shtëpia e saj në Madrid javën e kaluar, ka raportuar BBC, transmeton Gazeta Express.
Ministrat u mblodhën të martën për të diskutuar propozimet, të cilat përfshijnë ndalimin e dëbimeve deri në vitin 2030.
Duke njoftuar masat, Ministrja e Shëndetësisë, Mónica García, tha se ato do të sillnin lehtësim për më shumë se pesë milionë njerëz – por politikania e opozitës, Míriam Nogueras, tha se marrëveshja i linte “pronarët e vegjël në mëshirë të fatit”.
Propozimet – të cilat janë paraqitur në formën e dy dekreteve – hyjnë në fuqi menjëherë, por duhet të miratohen nga Kongresi brenda një muaji, ndonëse qeveria shpreson ta mbajë votimin që këtë të premte.
Qeveria e koalicionit të majtë të Pedro Sánchez-it nuk e ka shumicën në parlament dhe ka hasur vështirësi në sigurimin e miratimit të dekreteve të mëparshme nga partitë e krahut të djathtë.
Në prill, një dekret që synonte vazhdimin automatik të kontratave të qirasë u bllokua nga partitë e krahut të djathtë.
García, nga aleanca “Sumar”, tha se masat e tjera të rëna dakord të martën përfshinin vazhdimin e kontratave deri në vitin 2028; rregullim më të rreptë të qirave afatshkurtra dhe atyre për dhoma të veçanta; si dhe ndalimin e blerjes së banesave nga firmat investuese.
“Është koha për të ndërhyrë në tregun spekulativ të banesave dhe për të filluar vendosjen e një ekuilibri midis qytetarëve të zakonshëm dhe fondeve grabitqare,” tha García.
The post Spanja shpall ndalimin e dëbimeve pas protestave për largimin e një gruaje 87-vjeçare nga apartamenti appeared first on Gazeta Express.
