Pasagjerët në rajonin e Furttalit, në kantonin e Cyrihut, tashmë mund të rezervojnë udhëtim me një automjet autonom. Projekti pilot synon të testojë përdorimin e transportit pa shofer në zonat rurale.
Zvicra ka vënë në funksion robotaksinë e saj të parë. Në kuadër të projektit pilot “Iamo”, banorët e katër komunave në rajonin e Furttalit mund të rezervojnë përmes një aplikacioni udhëtim me automjete që lëvizin në mënyrë autonome.
Aktualisht janë në qarkullim tre automjete elektrike, të cilat shërbejnë rreth 100 pika të përcaktuara në komunat Boppelsen, Dänikon, Hüttikon dhe Otelfingen.
Sipas Christine Mauelshagen, drejtuese e përgjithshme e projektit “Iamo”, pasagjeri i parë nga Otelfingen e ka përjetuar pozitivisht udhëtimin.
Si funksionon shërbimi?
Pasagjerët mund të shkarkojnë aplikacionin “Iamo”, shkurtim për “intelligent automated mobility”, në App Store ose Google Play. Pas regjistrimit, ata mund të rezervojnë udhëtimin.
Në çdo automjet mund të udhëtojnë deri në tre pasagjerë, të cilët merren në pikat e përcaktuara paraprakisht.
Për momentin, automjetet autonome funksionojnë çdo ditë nga ora 13:00 deri në 17:00.
“Është e rëndësishme për ne që ta zhvillojmë këtë projekt hap pas hapi”, deklaroi Pascal Kern, drejtues i Zyrës së Mobilitetit të kantonit të Cyrihut.
Ku qarkullojnë robotaksitë?
Shërbimi është aktualisht i disponueshëm në katër komuna të kantonit të Cyrihut: Boppelsen, Dänikon, Hüttikon dhe Otelfingen, në luginën e Furttalit.
Rajoni është përzgjedhur për shkak të potencialit që paraqesin zonat rurale për përdorimin e transportit autonom. Në të njëjtën kohë, në këtë zonë ekziston edhe një linjë treni suburban, çka u mundëson drejtuesve të projektit të testojnë lidhjen e teknologjisë autonome me format ekzistuese të transportit publik.
Projekti “Iamo” zhvillohet nga Swiss Transit Lab, në bashkëpunim me kantonet e Cyrihut dhe Aargaut dhe Hekurudhat Federale Zvicerane (SBB).
Sa kushton një udhëtim?
Çmimi bazë i një bilete është 4.70 franga zvicerane, ndërsa për çdo kilometër paguhen edhe 0.38 franga.
Meqë bëhet fjalë për një projekt pilot, shërbimi nuk është pjesë e sistemit të transportit publik. Për këtë arsye, abonimet zvicerane të transportit, si GA Travelcard apo Half-Fare Travelcard, nuk janë të vlefshme.
Sa të sigurta janë automjetet autonome?
Edhe pse automjetet qarkullojnë në trafikun e zakonshëm, aktualisht në sediljen e shoferit ndodhet një person përgjegjës për sigurinë. Sedilja e pasagjerit pranë tij mbetet e lirë për arsye sigurie.
Operacioni aktual bazohet në një seri testesh të zhvilluara që nga vera e vitit 2025. Në fazën fillestare, fokusi ishte krijimi i një harte të detajuar dhe të saktë të zonës ku po zhvillohet projekti.
Në nëntor 2025, Zyra Federale Zvicerane e Rrugëve (ASTRA) dha autorizimin për përdorimin e automjeteve në mënyrë të automatizuar. Sipas autoriteteve, testet e deritanishme kanë kaluar përgjithësisht pa probleme.
Një incident me dëme materiale
Megjithatë, së fundmi ka ndodhur edhe një incident me dëme materiale. Sipas njoftimit zyrtar, një automjet që lëvizte me rreth 20 km/h nuk identifikoi një pllakë të vendosur në rrugë, e cila ishte pjesë e një sinjalistike për kufizimin e shpejtësisë në 30 km/h.
Si pasojë e kalimit mbi të, u dëmtuan gomat e automjetit.
ASTRA konfirmoi se automjetet e tjera mund të vazhdonin të operonin në mënyrë të sigurt.
Pasagjerët mund të ndjekin në ekranin brenda automjetit mënyrën se si sistemi identifikon pengesat dhe analizon mjedisin përreth.
Hapi i radhës: autobusë autonomë
Projekti “Iamo” ka nisur në fund të vitit 2024 dhe është planifikuar të zgjasë deri në pesë vjet.
Në fazën e ardhshme pritet që në rrugët e Furttalit të dalin edhe minibusë të automatizuar, të cilët potencialisht mund të qarkullojnë pa praninë e një personi sigurie në bord.
Këta minibusë do të monitorohen në distancë nga personel i trajnuar. Për këtë fazë nevojitet një autorizim i veçantë nga ASTRA.
Ndërkohë, automjetet autonome që përdoren aktualisht do të vazhdojnë të kenë një person përgjegjës për sigurinë në bord/albinfo.ch/
The post Zvicra vë në qarkullim robotaksinë e parë autonome appeared first on Gazeta Express.
