Rusia ka sulmuar Ukrainën me një valë masive dronësh dhe raketash gjatë orëve të hershme të së enjtes, duke lënë të paktën një të vdekur dhe 33 të plagosur në Kiev, thanë autoritetet ukrainase.
Sipas Forcave Ajrore të Ukrainës, mbrojtja ajrore rrëzoi ose bllokoi 693 objektiva ajrore, përfshirë 41 raketa dhe 652 dronë. Megjithatë, disa raketa dhe dronë goditën 24 lokacione nëpër vend, ndërsa dëme u raportuan edhe në Kiev, Kharkiv, Sumy, Odesa dhe qytete të tjera.
Presidenti ukrainas Volodymyr Zelensky tha se Rusia përdori raketa balistike dhe raketa lundruese, duke shtuar se sulmet tregojnë se Moska nuk po synon përfundimin e luftës. Ai bëri thirrje për vazhdimin e mbështetjes ndërkombëtare për mbrojtjen ajrore të Ukrainës.
Në lagjen Darnytsia të Kievit, një ndërtesë banimi u shemb pjesërisht pas sulmit, ndërsa ekipet e shpëtimit nxorën dhjetëra persona nga rrënojat. Kryetari i Kievit, Vitali Klitschko, tha se 18 apartamente janë shkatërruar dhe se pati probleme me furnizimin me ujë në disa pjesë të qytetit.
Sipas AP, sulmi ndodhi vetëm disa orë pas një tjetër sulmi masiv gjatë ditës së mërkurë, ku Ukraina tha se Rusia përdori rreth 800 dronë ndaj afro 20 rajoneve të vendit, përcjell KosovaPress.
Ministri i Jashtëm ukrainas, Andrii Sybiha, e lidhi sulmin me vizitën e presidentit amerikan Donald Trump në Kinë dhe takimin e tij me presidentin kinez Xi Jinping, duke thënë se Rusia po vazhdon të paraqesë kërcënim për sigurinë ndërkombëtare.
The post Një i vdekur dhe 33 të plagosur në Kiev nga sulmet ruse appeared first on Gazeta Express.
