Një 25-vjeçar me origjinë nga Kosova, banues në Treviso të Italisë, është dënuar me dy vjet e katër muaj burgim për përndjekje, kërcënime dhe fyerje ndaj xhaxhait dhe anëtarëve të tjerë të familjes, transmeton albinfo.ch.
Sipas mediave italiane, i riu ishte arrestuar më 11 nëntor 2025, pas një serie incidentesh që kishin zgjatur rreth një muaj e gjysmë. Ai dyshohej se ishte paraqitur vazhdimisht në lokalet e xhaxhait të tij në Paese dhe Susegana, ku e kishte kërcënuar dhe fyer atë dhe familjarët e tjerë.
Sipas Prokurorisë, konflikti kishte nisur për shkak të pretendimit të 25-vjeçarit se familjarët e kishin mashtruar lidhur me pronësinë e një pjese të pasurisë familjare në Kosovë.
Në një rast, ai dyshohet se kishte kërcënuar familjarët se do t’i vriste nëse nuk qëndronin larg familjes së tij. Gjithashtu, ai kishte publikuar një video në TikTok, ku pretendonte se ushqimi në lokalet e xhaxhait ishte i cilësisë së dobët dhe paraqiste rrezik për klientët. Më pas, sipas akuzës, kishte dëmtuar edhe pajisje, mobilie dhe automjete të përdorura për shpërndarjen e ushqimit.
25-vjeçari ishte akuzuar edhe për tentativë zhvatjeje dhe grabitje. Për akuzën e grabitjes, gjykata e shpalli të pafajshëm.
Gjykata vendosi gjithashtu që pas përfundimit të dënimit me burgim, ai të qëndrojë edhe një vit nën mbikëqyrje në një qendër trajtimi. Vendimi u mbështet edhe në një ekspertizë psikiatrike, sipas së cilës i riu konsiderohet shoqërisht i rrezikshëm, ndërsa aftësia e tij për të kuptuar dhe marrë vendime ishte dukshëm e zvogëluar.
Për katër familjarë, përfshirë xhaxhain, gjykata njohu një kompensim të përkohshëm prej 30 mijë eurosh, ndërsa shuma përfundimtare e dëmshpërblimit do të përcaktohet nga gjykata civile.
The post Dy vjet e katër muaj burg për 25-vjeçarin nga Kosova, kërcënoi dhe përndoqi xhaxhain në Itali appeared first on Gazeta Express.
