Nickolay Mladenov, diplomati më i lartë që mbikëqyr armëpushimin e ndërmjetësuar nga SHBA-ja në Gaza, pranoi të mërkurën se armëpushimi kishte ngecur, duke thënë se bllokimi mbi çarmatosjen e Hamasit kishte paralizuar rindërtimin e territorit të shkatërruar nga lufta.
Mladenov shprehu zhgënjim me status quo-në që ka dalë që nga arritja e armëpushimit tetorin e kaluar dhe tha se zyra e tij po adreson shkeljet nga të dyja palët çdo ditë.
Por ai përmendi vazhdimisht çështjen e çarmatosjes si një pikë kyçe, duke thënë se detyrimi i Hamasit për të hequr dorë nga arsenali i tij është “i panegociueshëm” dhe se përparimi në të gjitha çështjet e tjera – duke përfshirë rindërtimin, tërheqjen e trupave izraelite dhe krijimin e një qeverie të re palestineze – po vonohej, raporton Associated Press, transmeton Klankosova.tv.
“Nuk mund të ndërtosh një të ardhme me grupe të armatosura që vrapojnë nëpër rrugë, fshihen në tunele dhe grumbullojnë armë. Nuk mund të arrish rindërtim me milicitë në çdo cep”, u tha Mladenov gazetarëve të huaj në Jerusalem.
Ai nuk tha se çfarë ishte planifikuar nëse Hamasi nuk çarmatoset, por paralajmëroi se pa të, Gaza përballet me një të ardhme me “mjerim” të zgjatur.
Mladenov tha se Bordi i Paqes e ka përkthyer planin origjinal të Trumpit në një “udhërrëfyes të detajuar zbatimi” prej 15 pikash që është diskutuar shumë herë me përfaqësuesit e Hamasit në Kajro.
Ai tha se dy versione të propozimit iu paraqitën Hamasit, i dyti “u rishikua në mënyrë të qartë për t’iu përgjigjur pyetjeve dhe shqetësimeve që ngritën fraksionet palestineze në diskutimet tona”.
