Izraeli ka reaguar ashpër ndaj presidentit francez Emmanuel Macron, pasi ai kritikoi veprimet izraelite në Bregun Perëndimor gjatë fjalimit të tij në Asamblenë e Përgjithshme të Kombeve të Bashkuara.
Në fjalimin e tij të martën, Macron dënoi situatën humanitare në Gaza dhe bëri thirrje që vendet të rikthehen te respektimi i së drejtës ndërkombëtare dhe forcimi i sistemit të Kombeve të Bashkuara.
Duke folur për situatën në Bregun Perëndimor, Macron tha se “Hamas nuk ka kryer kurrë sulm në Bregun Perëndimor”, duke iu referuar territorit që Izraeli e pushtoi në vitin 1967 dhe ku Autoriteti Palestinez ushtron kontroll të kufizuar civil.
Zyra e kryeministrit izraelit Benjamin Netanyahu e cilësoi deklaratën si një “absurditet grotesk”, transmeton Telegrafi.
“Është e pabesueshme se sa larg realitetit është kjo deklaratë”, thuhej në reagimin e zyrës së Netanyahut, e cila shtoi se militantët e Hamasit kanë kryer sulme ndaj izraelitëve në Bregun Perëndimor.
Reagimi izraelit iu referua edhe vrasjes të dielën të një kolonisti izraelit në Bregun Perëndimor, një ngjarje që ndodhi në prag të Yom Kippur, ditës më të shenjtë të kalendarit hebre.
Sipas Izraelit, viktima, Netanel Shukrun, ishte baba i gjashtë fëmijëve dhe kishte edhe shtetësi franceze.
Ushtria izraelite tha se kishte arrestuar të dyshuarin palestinez në një spital dhe më pas kishte kryer një operacion në fshatin e tij. Një ministër në qeverinë e Netanyahut bëri thirrje që i dyshuari të ekzekutohej në bazë të një ligji të ri.
Ndërkohë, Kombet e Bashkuara kanë dokumentuar dhunë të vazhdueshme nga kolonët izraelitë ndaj palestinezëve dhe pronave të tyre. Sipas OKB-së, deri në mesin e vitit 2026 janë regjistruar mesatarisht rreth gjashtë incidente të dhunshme të lidhura me kolonët çdo ditë në Bregun Perëndimor.
Edhe ambasadori amerikan në Izrael, Mike Huckabee, kritikoi fjalimin e Macronit, duke shkruar në rrjetin X se ishte e vështirë të imagjinohej një fjalim “më larg realitetit”.
The post Izraeli e quan “absurditet grotesk” deklaratën e Macronit për Bregun Perëndimor në OKB appeared first on Gazeta Express.
