Kanë kaluar gati 30 vjet nga vdekja e Princeshë Dianës në një aksident automobilistik në Paris, por detajet e ditëve pas tragjedisë vazhdojnë të shkaktojnë debat. Këtë herë, në qendër të vëmendjes është vëllai i saj, Earl Spencer, i cili ka publikuar librin e tij të ri, Swan Song.
Funerali zyrtar i Dianës u zhvillua më 6 shtator 1997, në Westminster Abbey në Londër. Në fjalimin e tij, Spencer tha se kujtimi i motrës së tij nuk do të “shuhej kurrë”. Sipas tij, ai e kishte zgjedhur me qëllim këtë shprehje, pasi Charles i kishte thënë se Diana do të harrohej shpejt.
Me librin e ri, Spencer duket se po përpiqet të mbajë gjallë kujtimin e saj dhe të tregojë versionin e tij për atë që ndodhi.
Në një intervistë për BBC-në, Spencer tha se po flet jo vetëm si vëllai i Dianës, por edhe si dikush që ka qenë dëshmitar i ngjarjeve të rëndësishme. Ai e konsideron këtë si një detyrë që duhet ta përmbushë në këtë fazë të jetës së tij.
“Të dy prindërit e mi vdiqën në të 60-at dhe unë jam në të 60-at”, tha ai. Spencer shpjegoi se kjo e ka bërë të mendojë më shumë për jetën dhe vdekjen dhe se dëshironte t’i shkruante një herë e mirë kujtimet e tij dhe atë që ai beson se është e vërtetë.
Duke folur për Dianën, Spencer u emocionua dhe tha se “ajo i mungon çdo ditë”. Ai shtoi se humbja e një vëllai apo motre është një dhimbje me të cilën njeriu nuk mësohet kurrë plotësisht.
Sipas Spencer, ka disa arsye pse vendosi të flasë pikërisht tani: përvjetori i 30-të i vdekjes së Dianës që po afrohet, dëshira për të korrigjuar ato që ai i konsideron si të pavërteta të përsëritura ndër vite dhe fakti se tashmë është në një moshë kur mendon më shumë për trashëgiminë që do të lërë pas.
Por libri nuk lidhet vetëm me kujtimet e Dianës. Ai prek edhe marrëdhënien e gjatë dhe të ndërlikuar të Spencer me familjen mbretërore.
Sipas rrëfimit të Spencer, përplasja me Charles ndodhi gjatë telefonatës së dytë që ata patën në javën pas vdekjes së Dianës. Ai thotë se këto ishin të vetmet telefonata që kanë bërë ndonjëherë.
Spencer tregon se kishte kundërshtuar vendimin që William dhe Harry të ecnin pas arkivolit të nënës së tyre gjatë funeralit. Ai besonte se Diana nuk do të kishte dashur që djemtë e saj të përballeshin me gjithë atë vëmendje dhe presion publik në një moment kaq të dhimbshëm për ta.
Sipas rrëfimit të Spencer, kjo përgjigje e zemëroi shumë Charles. Ai pretendon se pikërisht në atë moment Charles tha se Diana do të harrohej shumë shpejt.
Këto pretendime u rikthyen në qendër të vëmendjes pasi Pallati Buckingham publikoi një deklaratë që kundërshtonte një tjetër pjesë të rrëfimit të Spencer për telefonatën e parë me Charles. Spencer më pas iu përgjigj deklaratës së Pallatit gjatë një interviste për BBC-në, të realizuar në Althorp, pronën e familjes Spencer ku Diana është varrosur.
Spencer tha gjithashtu se beson se rrëfimi i tij për këto telefonata nuk do të ishte surprizë për William dhe Harry.
Qëndrimi i Spencer ndaj monarkisë
Marrëdhënia e Spencer me familjen mbretërore ka qenë e ndërlikuar që prej funeralit të Dianës. Në ceremoninë mortore, ai mbajti një fjalim që u interpretua gjerësisht si kritikë ndaj monarkisë britanike.
Në fjalimin e tij, Spencer premtoi se do të bënte gjithçka që William dhe Harry të mos rriteshin vetëm nën peshën e detyrës dhe traditës mbretërore, por të kishin mundësi të përjetonin edhe aspekte të ndryshme të jetës.
Megjithatë, Spencer thekson se nuk është kundër monarkisë. Ai thotë se vazhdon ta mbështesë institucionin, por beson se ai duhet të përshtatet me kohën dhe të bëhet më modern.
Spencer ka mohuar përfshirjen e detajeve të bujshme në librin e tij vetëm për të shitur më shumë kopje.
The post “Do të harrohet shpejt”, shpërthen skandali 30 vite pas vdekjes së Princeshë Dianës appeared first on Gazeta Express.
