Viti i ri shkollor 2026–2027 ka nisur në të gjithë vendin, me mijëra nxënës që rikthehen në bankat e shkollës dhe rreth 25 mijë fëmijë që nisin për herë të parë klasën e parë.
Viti i ri shkollor shoqërohet me një sërë masash dhe ndryshimesh në arsimin parauniversitar, me fokus te përmirësimi i infrastrukturës, forcimi i sigurisë në shkolla, zgjerimi i shërbimit psiko-social dhe krijimi i më shumë mundësive për aktivitete jashtë orarit mësimor.
Në vitin shkollor 2026–2027, 53 shkolla të reja ose të rehabilituara hapin dyert për nxënësit. Paralelisht, janë miratuar edhe 39 projekte të tjera për rikonstruksionin e shkollave, duke vijuar investimet në përmirësimin e infrastrukturës arsimore.
Ndërhyrjet në institucionet arsimore synojnë krijimin e kushteve më të mira për zhvillimin e procesit mësimor, ndërsa në shkolla janë parashikuar edhe ambiente dhe pajisje të reja, përfshirë laboratorët inteligjentë dhe “smartlab”-et.
Gjatë vitit shkollor nxënësit do të kenë mundësi të angazhohen edhe në aktivitete të ndryshme akademike dhe krijuese, përfshirë festivalin e shkencës, olimpiadat, konkurset e gjuhës dhe aktivitetet muzikore.
Siguria është një nga prioritetet kryesore të këtij viti shkollor. Në institucionet arsimore në të gjithë vendin do të jenë në shërbim të nxënësve mbi 400 oficerë sigurie, të cilët do të veprojnë sipas protokolleve dhe standardeve të përditësuara. Në kuadër të forcimit të masave të sigurisë, 20 shkolla në Tiranë janë përfshirë në projektin pilot “Smart City”.
Në këto shkolla parashikohet përdorimi i kamerave inteligjente, si pjesë e masave të shtuara për monitorimin dhe sigurinë e ambienteve shkollore. Krahas masave të sigurisë, gjatë vitit shkollor 2026–2027 është fuqizuar edhe shërbimi psiko-social.
Në shkollat e vendit do të jenë të pranishëm 900 psikologë dhe punonjës socialë, të cilët do të ofrojnë mbështetje për nxënësit dhe do t’u përgjigjen nevojave të tyre sociale dhe emocionale. Një nga risitë kryesore të këtij viti është zgjerimi i programit “Pas Shkolle”.
Pas fazës pilot të zhvilluar në Tiranë gjatë vitit të kaluar, programi këtë vit shtrihet në 408 shkolla në të gjithë Shqipërinë.
Programi synon të krijojë mundësi që nxënësit të qëndrojnë edhe pas përfundimit të orarit mësimor, duke u angazhuar në aktivitete të ndryshme.
Në kuadër të programit do të zhvillohen klube dhe aktivitete në fusha të tilla si arti, muzika, teatri, sporti, zejet dhe aktivitete të tjera krijuese.
Nxënësit dhe prindërit do të informohen gjatë javëve të para të vitit shkollor për mënyrën e funksionimit të programit dhe për mundësitë e përzgjedhjes së aktiviteteve.
Për zhvillimin e tyre është hapur edhe thirrja për trajnerë. Në këtë proces mund të përfshihen mësues, mësues në pension, artistë, artizanë dhe profesionistë të fushave përkatëse.
Të dhënat paraprake për vitin e ri shkollor tregojnë gjithashtu një lëvizje të nxënësve nga arsimi jo-publik drejt sistemit publik.
Rreth 1,200 nxënës janë transferuar nga shkollat jo-publike në shkollat publike për këtë vit shkollor. Kjo lëvizje përbën një nga treguesit e ndryshimeve në strukturën e regjistrimeve për vitin 2026–2027.
Përveç procesit mësimor, gjatë vitit të ri shkollor pritet të ketë një fokus më të madh edhe te zhvillimi i aktiviteteve jashtëshkollore.
Nxënësit do të kenë mundësi të marrin pjesë në olimpiada, konkurse, aktivitete shkencore, kulturore dhe artistike, ndërsa programi “Pas Shkolle” synon të zgjerojë këto mundësi në 408 shkolla.
Në këtë kuadër, shkollat synojnë të shërbejnë jo vetëm si ambiente për zhvillimin e mësimit, por edhe si hapësira ku nxënësit mund të zhvillojnë aftësitë e tyre në fusha të ndryshme. /Tch/
