Rrezikun për veten s’e mori parasysh.
Pa u stepur, ky qytetar vendosi flamurin me emblemën e Ushtrisë Çlirimtare të Kosovës, afër një prej figurave më të rëndësishme të historisë shqiptare.
E pikërisht në sheshin që mban emrin e Skënderbeut u bënë bashkë dhjetëra mijëra qytetarë, për të kërkuar drejtësi për Hashim Thaçin, Kadri Veselin, Jakup Krasniqin e Rexhep Selimin.
Mosha s’kishte rëndësi.
Të rinj e të moshuar brohorisnin emrat e katërshes së UÇK-së, që prej vitesh po përballen me procesin gjyqësor në Hagë.
“Ky marsh është shumë i rëndësishëm për popullin shqiptar, është marsh vendimtar për popullin e Kosovës, sepse synojmë që përmes këtij marshi ti tregojmë faktorit ndërkombëtarë që populli i Kosovës e ka dashtë dhe e don lirinë”, u shpreh qytetari, Ahmet Vishi.
Procesit vendimmarrës pak i druhen, për shkak se dyshojnë se aty mund të kenë dorë armiqtë e Kosovës. Megjithatë, besimin në drejtësi e shprehin.
“Është shumë problematike, sepse atje ka ndikim të madh Serbia Rusia dhe aleatët e saj, por shpresojmë se do të triumfojnë e drejta dhe e vërteta”.
Veteranët e luftës, megjithatë, janë optimist për datën 16 shtator.
“Presim që më 16 shtator, të mirret vendimi i duhur, i drejtë, të lirohen bashkëluftëtarët tonë, dhe prapë të festojë Kosova për lirinë e arritur”, u shpreh veterani i luftës, Nesret Shashivari.
“Ishalla me 16-tin e festojmë lirimin e ushtarëve, ose pavarësia e dytë e Kosovës”, u shpreh veteranja, Eliverta Alija.
Ndërkohë, mërgimtarët, janë të bindur se çlirimtarët do të rikthehen në Kosovë.
“Nesër kemi me ec për Gjermani, po kismet, ditën që lirohen ne jemi këtu”.
