Kryetari i Partisë Demokratike të Kosovës, Bedri Hamza, ka bërë të ditur se PDK-ja nuk do të marrë më pjesë në punimet e Kuvendit të Kosovës.
Ky vendim vjen pasi kandidatja e PDK-së për nënkryetare të Kuvendit, Vlora Çitaku, nuk u zgjodh në votim. Çitaku mori 44 vota për, një kundër dhe 56 abstenime.
Hamza ka deklaruar se PDK-ja do ta dërgojë rastin në Gjykatën Kushtetuese.
“PDK ishte prezent në Kuvend me qëllim që Kuvendi të konstituohet, që vendi të ketë institucione, mirëpo partia shumicë, Lëvizja Vetëvendosje, Albin Kurti, nuk e ka ndërmend vendit t’i japë institucione. Vazhdon me veprimet e tyre të papërgjegjshme, joinstitucionale, joshtetërore, jo në dobi të qytetarëve të Kosovës të prodhojë drama, kriza, me shpikë situatë të panjohura me qëllim që të vazhdojë me bllokada. Prej sot Partia Demokratike e Kosovës nuk ka asnjë arsye me marrë pjesë në punimet e Kuvendit të Kosovës dhe ne do ta referojmë, do ta dërgojmë lëndën në Gjykatën Kushtetuese. Jemi të sigurt që afatet kanë përfunduar më 7 gusht”, ka deklaruar Hamza.
