Sot do të vazhdojë punimet seanca konstituive e Kuvendit të Kosovës, ndërkaq në rend dite është zgjedhje e nënkryetarëve të Kuvendit.
Seanca është planifikuar të mbahet në ora 11:00.
Ndryshe, procesi i konstituimit të Kuvendit ka mbetur te pika e nënkryetarëve të Kuvendit.
Të mërkurën, u zgjodh kryetarja e Kuvendit, Albulena Haxhiu, por procesi mbeti te nënkryetarët, pasi deputeti nga radhët e Listës serbe, propozoi kandidatin për nënkryetar duke e nisur me fjalinë “në emër të popullit serb”.
Pas kësaj deklarate, kryetarja Haxhiu ndërpreu seancën, duke thënë se kjo është antikushtetuese.
Ajo theksoi se në Kosovë ka komunitet serb, jo popull serb.
Edhe pas pauzës, në tentativën e dytë, Simiq nuk tërhoqi fjalën, gjersa tha sërish se është pjesëtar i popullit serb.
Pas kësaj, kryetarja ndërpreu punimet e seancës.
Haxhiu po ashtu në seancën e kaluar kishte deklaruar se nuk ka pajtim as ndërmjet LVV, PDK e LDK-së për mënyrën e zgjedhjes së nënkryetarëve. /Telegrafi/
