Ministrat e Singaporit tashmë janë ndër politikanët më të paguar në botë, ndërsa kryeministri Lawrence Wong fiton më shumë se katër herë pagën vjetore shtetërore të presidentit amerikan Donald Trump.
Tani, Wongut i është rritur paga me 1 milion dollarë, ndërsa ky qytet-shtet i pasur ka vendosur një rritje të konsiderueshme të pagave të ministrave për herë të parë pas 15 vjetësh, shkruan CNN, transmeton Gazeta Express.
Duke njoftuar rritjen e pagave në parlament të martën, udhëheqësi i Singaporit tha se ky rregullim ishte i nevojshëm për të tërhequr njerëz të talentuar në shërbimin publik, veçanërisht pasi hendeku mes kompensimit të udhëheqësve politikë dhe drejtuesve të sektorit privat është zgjeruar vitet e fundit.
Paketa vjetore e pagës së Wongut do të rritet me pothuajse 64%, nga 2.2 milionë dollarë singaporianë (1.7 milionë dollarë amerikanë) në 3.6 milionë dollarë singaporianë (2.8 milionë dollarë amerikanë), ndërsa ministrat e tjerë do të përfitojnë rritje deri në 9%. Wong është zotuar se rritjen e pagës së tij do ta dhurojë për bamirësi për pesë vjet.
Shteti i Azisë Juglindore prej kohësh i ka justifikuar pagat e larta të politikanëve si një masë të rëndësishme për frenimin e korrupsionit, i cili është i përhapur në disa nga vendet fqinje.
Singapori u rendit në vendin e tretë në Indeksin e Perceptimit të Korrupsionit për vitin 2025 të Transparency International, i cili mat nivelin e perceptuar të korrupsionit në sektorin publik. Për krahasim, Shtetet e Bashkuara u renditën në vendin e 29-të.
Njoftimi shkaktoi reagime të shumta negative në rrjetet sociale, në një vend ku pagat e larta të ministrave janë një temë e ndjeshme, ndërkohë që të ardhurat mesatare mujore ishin 5,775 dollarë singaporianë (4,500 dollarë amerikanë) vitin e kaluar.
“Duke pasur parasysh pasigurinë ekonomike dhe ndryshimet e afërta teknologjike që pritet të prekin vendet e punës, ky njoftim mund të perceptohet si i pandjeshëm ndaj realitetit apo madje edhe si një veprim në interes të vetë udhëheqësve”, tha Eugene Tan, analist politik dhe profesor i asociuar i së drejtës në Universitetin e Menaxhimit të Singaporit.
Tan shtoi se, ndonëse shumica e singaporianëve e pranojnë se pagat e ministrave nuk mund të konkurrojnë me ato të drejtuesve më të paguar të sektorit privat, ata ende e kanë të vështirë emocionalisht të pranojnë që udhëheqësit e tyre të fitojnë paga kaq të larta.
Edhe para rritjes së fundit, paga e Wongut tejkalonte ndjeshëm 400 mijë dollarët që presidenti i SHBA-së merr në vit, para tatimit, dhe ishte shumë më e lartë se paga e udhëheqësit të dytë më të paguar, shefit ekzekutiv të Hong Kongut, John Lee, i cili fiton 719 mijë dollarë në vit.
Wong pranoi se kjo është një “çështje e vështirë dhe emocionalisht e ndjeshme”, e cila do të jetë objekt i një shqyrtimi të hollësishëm.
The post Politikanit më të paguar në botë i rritet rroga edhe me 1 milion dollarë shtesë appeared first on Gazeta Express.
